Ayera ariba su pagina oficial di Facebook ex-minister y actual parlamentario y lider di fraccion MAS den Parlamento di Aruba, Marisol Lopez-Tromp, a publica un video den cual e ta indica cu gobernantenan di Aruba ta usa Parlamento di Aruba como un “get out of jail free card” pa kita culpabilidad di actonan cu no ta bon.
Den e video e parlamentario ta indica cu e ministernan di e gobierno aki cada biaha ta bay Parlamento di Aruba pa trata di kita culpabilidad di actonan cu nan ta haci cu ta bay robes, pa kita esakinan door di pasa leynan cu ta kita culpabilidad y hasta e oportunidad pa word investiga y enfrenta ur e consecuenicanan cu esaki por tin, hasta algun di esakinan penal.
“Kico nos a wak den lunanan cu a pasa? Nos a wak un minister Xiomara Maduro cu a bin parlamento den caso aki caminda cu el a paga overbrugging, placa,” el a menciona.
Den e video por wak e ora un parti di reunion den Parlamento di Aruba na unda minister Xiomara Maduro ta bisa: “Nan por cuminsa cobra overbrugging, kiermen e placa ta para eynan pa nan wordo paga. Kico a wordo haci? E placa ey a wordo paga mas prome.”
Esaki, Lopez-Tromp ta agrega, ta pa politiconan cu no ta activo mas, cu a wordo paga contra ley, den un luna cu e no mester a wordo paga y lunas despues a bay parlamento na unda a trata di kita su culpabilidad di e acto aki, y consecuentemente laga parlamento aproba cu forsa retro activo loke Maduro a haci mey aña pasa
“Normalmente si tabata otro minister, lo e mester a carga e consecuencianan,” Lopez-Tromp a enfatisa.
El a menciona den su video e situacion cu Fase y Minister Glenbert Croes. El a sigui splica cu mientras henter Aruba a haya ayudo den periodo di covid, por a tuma nota di e rapportnan di CAD y tambe di rekenkamer cu a mustra hopi cla, segun Lopez-Tromp ta bisa, cu e 92 miyon florin cu a wordo distribui no a bay den e forma corecto.
“El a bay den un forma inhusto, personanan cu a haya placa cu no mester a haya. Nan no tin un registro debido, e procesonan a bay robes. Pero ta bin parlamento y ta absolve nan mes di tur actuacion, tur paso, tur proceso cu por a bay robes y nos ta haya un mayoria den parlamento di MEP cu RAIZ ta aproba esaki,” Lopez-Tromp a agrega.
El a trece pa dilanti tambe e situacion recien di Arubahuis caminda cu, segun e ta indica, Prome Minister, Evelyn Wever-Croes, no kier a presenta e rapport na Parlamento di Aruba. E ta señala cu na momento cu parlamento a pidi e prome minister pa mystra e rapport den cual ta splica tur loke a pasa den Arubahuis cu a bay robes, Wever-Croes tabata “wanta e rapport scondi engaña parlamento cu e investigacion no ta cla.”
E rapport aki a sali na cla, y Lopez-Tromp a reamrca cu for di aña pasa e rapport tabata cla, pero cu Wever-Croes “no kier a duna parlamento e datonan aki.”
“Den caso di Arubahuis cada ken tin cu carga su responsabilidad y nos a tuma e pasonan cu mester a tuma,” por scucha Prome Minister ta bisa den un clip di un reunion di Parlamento di Aruba.
Siguientemente Lopez-Tromp a referi na e caso di loonsubsidie, cu tambe ta algo for di pandemia, caminda companianan chikito y mediano a wordo yuda cu miyones di florin. El a indica cu riba su mes esaki ta algo bon, pero di otro banda el a subraya cu tabatin cieto procesonan cu no a cana manera cu nan lo mester a cana.
El a splica cu nan wak den rapportnan, den caso di fase y aworaki den e caso di loonsubsidie tambe, cu ta resulta cu e leynan ta wordo discuti den Parlamento di Aruba y esaki ta mustra cu e actuacionnan di e gobernantenan no a bay segun procedura, no a cana e proceso, y normalmente cualkier minister lo haya consecuencia di esaki, pero el a enfatiza cu esaki no ta e caso pa e ministernan actual. .
“Atrobe un ley ta wordo trata pa kita e culpabilidad pa bay cu forsa retro activo back den tempo y bo por bisa kita tur e consecuencianan, tin di nan kizas hasta penal, cu lo por tin pa cierto ministernan. Loke nan ta bin busca na parlamento, bo por bisa ta un get out of jail free card, un garantia cu nan no ta wordo persigui, ni kico nan haci cu ta contra ley”, el a señala.
El a agrega cu esaki, en todo caso di parti di partido MAS, ta vota contra pasobra nan ta kere cu cada minister ta responsabel pa su actonan.
Pero segune ta remarca, loke nan ta mira aworaki ta solamente gobernantenan politiconan di opisicion tin cu carga e consecuencianan di cualkier acto pa tur. “Esnan cu ta den gobierno aki aparentemente tin cu sali liber di cualkier cos cu por tin consecuencia pa nan,” el a bisa.
