Tin un eleccion na caminda pa scoge e siguiente prome ministro, pero apenas un di cada 400 persona por vota. Y mayoria di e votado ta ‘un homber blanco di edad mayor’.
160.000 miembro di partido conservador lo scoge e siguiente lider for di e competencia entre candidato ex secretario di exterior Borin Johnson y secretario di exterior Jeremy Hunt.
E partido conservador lo bay scoge nan lider nobo cu lo bira prome ministro. Parlamento di Reino Uni ta den un impasse, nan salida di union Europeo posponi te cu 31 di october proximo, y e lider nobo lo determina si e pais ta sali di forma ordena, ta crash den caos economico, of ta keda den ‘limbo’.
Segun un estudio academico, 70% di miembro di partido conservador ta homber, e mita tin mas di 55 aña di edad, 86% ta di clase medio of superior, y 97% ta blanco, den un pais unda 10 pa 15% di poblacion ta un grupo etnico (minoria).
Mayoria di nan kier pa e pais sali di Union Europeo, sin importa e consecuencia. Tim Bale di Universidad Queen Mary na London a bisa cu den investigacion, mayoria di conservador a bisa cu un acuerdo di divorcio lo ta miho cu permanece den conexion cu norma comercial di UE. Esaki lo interumpi gravemente e comercio di UE y Reino Uni.
Mayoria di conservador ta considera e salida di UE un asunto di ‘bida of morto’ pa e partido cu a goberna e pais durante mas di mita di ultimo 100 aña. Moral di e partido ta riba vloer despues di resultado desastroso den eleccion local y di Parlamento Europeo luna pasa, cu a mira cantidad di votado conservador defecta na e recien forma Brexit Party, lidera pa Nigel Farage, kende ta acusa gobierno di May di traiciona e 17.4 miyon di persona cu a vota pa bandona UE.
Giles McNeal, lider di partido conservador, a bisa cu si Brexit no sosode prome cu 31 di october, Brexit Party lo ocupa nan espacio, y nan no ta wak e ‘Britanico pordona nan pa e traicion’.
