Mas di un decada despues cu mester a maneha e asunto na un manera debido y contundente, e siman aki nos por a presencia conclusion di e historia di e contrato dudoso entre gobierno di Aruba y e compania di promocion Lee Tofanelli, mediante un ley pa aproba e areglo di pago na cual a yega cu dicho compania.

Entre e gritonan acusador di varios banda, tabata haci falta e documentacion al caso. Despues cu tur tabata ‘said and done’ a aparece e rapport di 2010 di Centrale Accountantsdienst (CAD), cu lo mester tabata e guia central pa actuacion di cualkier gobierno cu cuatro placa di respet pa nan mes, tanto aña pasa… Kico e rapport a constata e tempo ey?

Na promer lugar, un actuacion contra ley na diferente momento di e ministro cu a atende e asunto, violando ley di contabilidad y faltando consulta cu e instancianan consehero di gobierno mes cu a keda poni un banda. Segun CAD, ta e ministro su so a negocia cu Lee Tofanelli. Sin embargo, cu e rapport aki den man, a tuma paso? Parcialmente, pasobra esaki a conduci na renuncia di e contrato pa banda di gabinete democrata cristian 2009 – 2013. Pero, aki a cuminza e procesonan den corte entre gobierno di Aruba y e compania cu tabata suministra servicio pa evento musical. Den corte di promer instancia, e compania a perde, pa gana su caso den apelacion den corte comun di e islanan. E mandatario responsable di e tempo ey, actualmente parlamentario, a opta pa no bay casacion. Seguidamente, e unico opcion tabata yega na un areglo di pago cu e compania. Te awor aki, e parti final ey ta tumando lugar, mas di 13 aña despues cu e hechonan a bira conoci.

Awor, kico nos por siña di e caso aki? Nos politiconan no tanto, no cu nan ta briya pa nan conocimento, pero mas pa nan testarudez emblematico den e tipo di asunto aki. Pero, den comunidad mester cuminza penetra e idea cu nos no por sigui tolera e tipo di actuacion aki cu ta conduci na un ‘free pass’ unda medida mas fuerte lo tabata na nan lugar. Ta asombroso pa scucha di banda di e partido di e ministro autor di e contrato cu e lo no a haci nada malo. E rapport di CAD, di algun luna despues cu tabatin cambio di gobierno na 2009, tabata base pa actua pero e siguiente gobierno no a actua manera tabata mester. Ora bo constata cu e proceso pa yega na un contrato no a bay segun regla, esey no den tur caso automaticamente ta haci cu e contrato ta nulo y no valido. Por ta cu bo no por ignora e contrato, pero en todo caso mester a tuma medida contra e ex-ministro, loke no a sucede. Awor, cu su partido na mando, esey mucho menos ta e caso.

Kico ta e problema fundamental cu nos ta encontra awor? Pa esey nos mester bay back na e inicio, unda e erornan garafal a ser cometi, cu di ningun manera, asina leu cu nos por constata, a keda coregi. E custumber di mantene un secretismo hermetico den caso di proyecto a para bira un arte, practica pa ambos gobierno di e colornan conoci. Fresco den nos memoria ta e famoso 2000 pagina di e contrato cu Citgo, cu oposicion di e tempo ey a haya tempo limita pa revisa, bao vigilancia bergonzoso di coordinador di gobierno. Aparentemente nan a ‘guli manda abao’, cu e posible proposito di usa e triki aki na nan bentaha, pasobra den e asunto di e contrato cu Eagle LNG nos a haya un repiticion di e mesun payasada aki. Kico nos por siña di esaki? Cu mientras e partidonan ta bringa otro, den asunto berdaderamente di peso nan no ta ataca otro pa loke ta e metodonan proba aki, pasobra cada ken cu yega na mando mester por haci uso di nan… Manera nan sa bisa na Hulandes: “uit welbegrepen eigenbelang”. Y ta aki nos ta yega na e punto clave, cu mientras ta hiba henter un bataya publicitario tocante punto menor, no ta ataca otro riba e punto principal cu te awe a keda sin drecha, esta e responsabilizacion inmediato ora constata e hechonan. Y esaki mester ta tambe e pregunta na e gobierno actual, pasobra e otronan a bay caba: “Con grandi ta e peligro cu awe, ‘as we speak’, ta tumando lugar e siguiente caso di contratacion indebido, pa aki tanto aña nos bolbe hiba e discusion aki?

Por ehemplo: nos a comprende for di anuncio di gobierno mes, cu pronto e proyecto di mehoracion di e plantanan di purificacion di awa sushi ta bay cuminza… Nos no a mira ainda e constitucion di e entidad legal cu ta bay ta encarga cu e proyecto, mucho menos a tuma nota di un proceso di destaho publico. Tur esey ta bay haci den un par di luna? O nos mester supone cu tur cos ta cla caba, ya tin un acuerdo na nivel di gobierno cu e entidad nobo y e contratista cu ta bay ehecuta? ‘Just asking…’ Ora ta papia di un inversion di tanto miyon florin, no ta parce nos algo cu ta regla ‘bao man’ sino a traves di un proceso di destaho manera stipula den ley. Y pa ripiti e palabra magico di nos Promer Ministro: nos por a haya djis un tiki ‘transparencia’ pronto den e proceso aki?