E siman aki a clausura un aña parlamentario y a habri otro. E inauguracion diamars ultimo tabata tradicionalmente e unico dia cu por mira algo di union den parlamento, cu e presencia di Goberndor pa duna na nomber di gobierno e discurso inicial. Manera ta custumber, e discurso tabata prepara pa gobierno y Gobernador a hiba palabra como hefe di gobierno di Aruba. Nos ta bisa esaki cu enfasis pasobra analisis critico di e discurso no ta referi na su persona, sino na responsabilidad di gobierno cu a traves di e Gobernador ta dirigi palabra na comunidad.

Un di e aspectonan cu a resalta tabata e enfasis riba derecho humano, igualdad social y proteccion di esnan mas vulnerable. Tur esey ta di aprecia y valioso, pero tabata haci falta mas detaye con esaki lo keda concretiza den e accionnan di gobierno den e aña nos dilanti. Esaki na su turno ta importante hustamente den un aña unda ta pidiendo un esfuerzo financiero grandi di comunidad, den cubrimento di gasto di e aparato publico te na tal grado cu por genera e surplus cu mester aparece pa e pais cuminza paga su debenan y no keda pega den paga interes so. Pa un opinion balanza no por keda sin menciona cu e medidanan fiscal cu a tuma pa genera e entrada aki a bay acompaña cu cierto medida pa proteccion di esnan cu e entradan mas modera. Sin embargo, esaki ta un compensacion parcial, cu e agravante cu nos no sa na e altura aki con leu esaki lo yega, mirando e desaroyo den economia mundial y kico lo ta e efecto riba esun di nos. Y di mes caba ta un hecho cu si gobierno mester keda cu hopi mas placa den caha, no ta bay duna esaki completamente back na e ciudadano.

Pa papia mas concretamente anto, kico ta e magnitud di e operacion financiero ey na 2024 y e añanan despues? Pa 2024 ta anticipa un aumento di Afl. 77 miyon na entrada compara cu 2023, y na gasto lo tin un aumento di Afl. 74 miyon. Esey ta implica cu e aumento di entrada extra ta bay casi ompletamente na aumento di gasto. Esey ta logico si nos mira cu tur categoria di gasto, di gasto di personal, bienes y servicio, interes riba debe, etc. ta subi. Esaki ta mustra tambe cu atrobe gobierno ta cumpli cu e parti di e recomendacionnan haci pa e conseheronan internacional y di Reino, cu ta e aumento di entrada a traves di cobra mas impuesto, por ehemplo mediante e aumento di BBO, pero ta laga un banda recomendacion pa baha gasto structuralmente. Nos ta sigur cu riba esaki ta bin e argumento cu den cuadro di reforma planifica, entre otro relaciona cu medidanan acorda den e Landspakket, lo tin gasto extra. Nos contesta lo ta cu esey ta corecto, pero ta solamente aumenta e obligacion pa baha gasto na otro lugar structuralmente, tumando e medidanan necesario, y ta net esey no ta haci. Por ehemplo, no a implementa e medida di deshaci di e aumento di salario automatico den e asina yama ‘periodiek’ pa empleado publico, cu parcialmente ta deshaci di e medida di baha antidad di empleado a traves di e.o. areglo di VUT. Tambe te awor ainda no ta haci nada cu e overtime absurdamente halto den e aparato.

Tambe e suma cu mester paga na interes ta aumenta innecesariamente pa e testarudez di gobierno di insisti den no yega na un acuerdo cu Hulanda encuanto nos debe aya. Otro aña nos pago di interes lo ta na Afl. 281 miyon, 31 miyon mas cu e aña aki, y como 17% di e total di entrada di e pais na 2024. Sin embargo, esaki ta e aumento si nos lo a haya un porcentahe faborable di Hulanda, loke no ta e caso manera nos por a comprende den ultimo dianan. Banda di esey gobierno lo a resta un suma di Afl. 70 miyon pa nos haya paga debe, pero esaki tambe lo bira menos anto, loke ta haci e moderacion di gasto structural mas urgente ainda, y loke no lo tuma lugar anto. Pa duna un poco mas detaye di kico e esfuerzo financiero di economia y ciudadano ta den e aña aki y na 2024: na 2024 gobierno lo haya Afl. 274 mas na entrada cu na 2022, y ta aumenta su gastonan cu Afl. 172 miyon, sin conta e extra interes na Hulanda aden. Mester bisa si cu un parti di e aumento di entrada di gobierno ta bin di e recuperacion di nos economia, cu e aña aki por ta na un nivel di Afl. 450 miyon mas na GDP compara cu 2019, y na 2024 por ta na alrededor di Afl. 700 miyon mas cu na 2019. Sin embargo, un parti importante lo mester bin di e cartera di e ciudadano, cu na e momento aki ta sinti e efecto di aumento di inflacion, tanto pa e situacion internacional como di e medidanan fiscal tuma. Awor ainda no por bisa tanto di e efecto di aumento di BBO e aña aki, tambe pasobra no tin ainda e cifranan desde augustus.

Contal cu durante e discurso di Gobernador, pa cual gobierno ta responsable, nos por a scucha un enfasis pisa riba bon intencion general pa cu bienestar y derecho di ciudadano, pero nada di e situacion mas dificil net pa esnan cu e cartera mas plat den nos comunidad.