Come anochi ta vincula cu un consumo mas halto di caloria, como tambe calidad di cuminda mas abao, segun un estudio nobo.
Mantene un dieta saludabel ta asocia cu con laat den dia hende ta consumi mayoria di nan cuminda, segun un investigacion presenta na e Conferencia Europeo y Internacional riba Obesidad (ECOICO 2020).
E estudio a haya cu hende cu ta consumi mayoria di nan caloria anochi usualmente ta consmi mas, y tin un dieta di menor calidad.
Meta di e estudio tabata pa explora e conexion entre consumo di caloria anochi – e medida di consumo di energia (Energy Intake- EI) – y calidad di dieta. Judith Baird, un investigado pa e Centro pa Cuminda y Salud di Innovacion di Nutricion na Universidad di Ulster na Nort Irlanda a lidera e estudio.
Ritmo di hamber
Estudionan anterior a haya cu hamber ta sigui un ritmo diario, y cu e ritmo aki ta, den algun forma, no loke hende ta spera. Maske hende tipicamente ta stop di come durante un periodo extendi di drumi, nan ta kibra e ayuno aki cu loke usualmente ta e cuminda mas chikito di dia.
Mientras tanto, hamber ta mas fuerte na final di e dia, cu un ‘peak’ alrededor di 8pm, na momento cu mayoria di hende a completa casi tur nan actividadnan diario.
Consumo EI naturalmente ta un respuesta na hamber, y otro investigacion a investiga e efecto di tempo di cuminda riba metabolismo y otro procesonan corporal. E estudio nobo, sinmebargo, ta mira e implicacionnan riba e calidad y cantidad di cuminda cu hende ta consumi.
Datonan usa den e estudio
Cuminsando na 2008, Encuesta Nacional di Dieta y Nutricion Britanico (NDNS) a captura informacion detaya tocante consumo di cuminda, consumo di nutriente, y status nutricional. Baird y su coleganan a analisa data di 1,177 adulto kende a participa den e encuesta desde 2012 te cu 2017.
En general, e investigadonan a haya cu e participantenan tabata, den averahe, consumiendo casi 40% (39.8%) di nan EI diario despues di 6pm.
Evaluando e datonan mas di cerca, e investigadonan a dividi hende den kwartiel segun e proporcion di nan EI diario cu nan a consumi despues di 6pm. E hende cu e kwartiel mas abao a consumi menos di 31.4% di nan EI anochi, mientras esunnan cu e kwartiel mas halto a come mas di 48.6% durante oranan di anochi.
Kico e data ta bisa
E investigadonan a detecta dos tendencia significativo den e data. Prome, e estudio a haya cu come mas laat ta afecta e EI total pa e dia. Hende cu a consumi mayoria di nan EI diario mas trempan tabata come menos caloria durante transcurso di un dia.
E hallazgonan tambe ta sugeri cu tempo di cuminda ta afecta e calidad nutricional di cuminda. Baird y su coleganan a evalua dietanan individual manera a wordo reporta den diarionan alimentario, cu a entrega na NDNS. Pa haci esaki, nan a consulta e clasificacionnan den Nutrient-Rich Food Index. E index ta clasifica cuminda segun nan ratio di nutriente importante pa balor di caloria.
Hende cu consumi mas di nan calorianan anochi usualmente tabatin dietanan di calidad significantemente mas pober.
Autornan di e estudio ta presenta nan hallazgo como solamente un faceta di un comprension mas profundo di e efecto di ritmo di cuminda diario di un persona y e cantidad y calidad di cuminda cu nan ta consumi. Nan ta conclui: “Tempo di EI por ta un comportamento importante pa considera modifica den intervencionnan nutricional futuro. Awo mester mas analisis pa examina si e distribucion di EI y/of e tipo di cuminda consumi anochi ta asocia cu medianan di composicion di curpa y salud cardiometabolico.”
