No tin mucho tempo pa sigui negocia cu Hulanda. Aki tres siman, e cash di Pais Aruba ta caba. Esey ta e mensahe cla y raspa cu Prome Minister tabatin ayera pa e grupo di profesionalnan hoben durante e Cumbre Uni pa Aruba.

E cumbre aki tabata similar na e presentacion cu a haci na gremionan, unicamente cu e biaha aki tabatin informacion di unda e negociacionnan cu Hulanda ta. Manera ta conoci, Hulanda ta dispuesto pa sigui duna sosten di liquidez pero bao condicionnan hopi impactante. Esta, cu e supervision financiero ta bira un ley di Reino di consenso (consensusrijkwet), y cu un entidad publico Hulandes, cu awor tin e homber Orgaan Herstel en Herhorming, OHH, lo implementa reformanan na un forma autonomo di Gobierno y Parlamento di Aruba. Esaki tambe bao di un ley di Reino.

Prome Minister Wever Croes a bisa cu nan tin seis siman negociando. No t’ey unda mester ta ainda. Tin algun di e ponencianan di Hulanda cu ta bay mucho leu. Pero no tin mucho opcion awor aki pa Aruba y mester di ayudo mas lihe posibel. Pesey ta sigui negocia cu Hulanda, unda entre otro a presenta e alternativa cu Parlamento a trece dilanti. “Nos no tin mucho mas rosea, y mester tuma decision. Nos ta pasando e pio crisis desde 1986.” Pero, segun Prome Minister, cada reto ta trece oportunidad. Y e intencion ta pa enfoca mas riba oportunidad.

Un biaha mas Director di Finanzas Derrick Werleman a duna un imagen di e situacion financiero di Aruba, cu a mira un caida di 33 porciento den su Producto Interno Bruto(GDP). Ingreso di exportacion, cu ta di turismo, a cay cu 47 porciento, y riba su mes ta sigui suprimi e consumo local, cu a haya un sosten danki na e loonsubsidie, FASE, e sosten na negoshi chikito y mediano, pa asina sigui sostene economia di Aruba mas tanto posibel. E di dos ola di infeccion di Covid19 sinembargo, tambe lo tin su efecto, Werleman a bisa.

E recuperacion economico lo no sucede na 2021 tampoco, cu ta nifica cu Aruba ta keda den un situacion precario. Hulanda ta keda e unico avenida pa haya financiamento, segun e Director di Finanzas, y esaki ta un suma astronomico di 1.1 biyon florin pa 2020, cu ta inclui e contribucionnan na fondonan di AZV y SVB di 234.1 miyon florin, loonsubsidie y FASE. “Prome Aruba por a fia riba mercado internacional, pero esaki ta practicamente cera,” Derrick Werleman a sigui splica, agregando cu pa 2021, e prestamo mester ta di 1.4 biyon florin, cu ta inclui debenan cu ta madura y cu mester refinancia.

Esaki lo ta prome biaha cu Aruba ta presta di Hulanda. E prestamonan pa e aña aki ta na 0 porciento, pero pa e siguiente dos añanan nan ta subi na dos porciento. Asina mes, compara cu e mercado internacional, e ta nifica cu Aruba lo scapa mas di 80 miyon na interes den ocho aña. E intencion ta pa refinancia unicamente e debe internacional, y no e debe local, pa asina no hinca institucionnan local cu ta cumpra bononan di Gobierno, den problema financiero. “Si no yega na un acuerdo di financiamento cu Hulanda, e saldo den caha di Gobierno lo ta den un posicion fastioso pa september,” Werleman a bisa.

Prome Minister Wever Croes di su banda a bisa cu e negociacionnan ta treciendo algun cambio di posicion, aunke no mes leu cu Aruba lo kier. E papel di e entidad independiente OHH ta keda crucial y Aruba no tin mucho di bisa den e responsabilisacion di su funcionamento. Pero en todo caso, Hulanda ta habri pa trece algun ahustacion unda por ehempel Aruba por duna un indicacion ken e lo kier den e organo, y tambe cu e entidad ta keda cu e autoridad pa supervisa pero cu ta Aruba mes ta implementa su reformanan.

Prome Minister a bisa cu mester realisa cu e proposicion di Hulanda ta pa un periodo di seis aña. Covid19 a haci un daño hopi grandi y e sosten ta un ayudo transitorio, unda Hulanda kier tin siguranza cu e plannan ta funcciona. Con cu bay bin, e pais mester duna cuenta na e pagador di belasting Hulandes. “ No tin un fecha final pa negocia. Pero nos tin dos a tres siman so pa logra. Nos lo no laga e pais aki kibra,” ta e mensahe di Prome Minister Evelyn Wever Croes.