Logro global: Model IA di Radboudumc por diagnostica sindromanan pa medio di scan cara

(NLTimes)—Investigadonan na Universidad Centro Medico Radboudumc a desaroya un model di inteligencia artificial (IA) cu por diagnostica desordennan di desaroyo y sindromanan causa pa abnormalidad genetico simplemente por medio di scan e cara di e pashent hubenil. Esaki por resulta den claridad rapido riba sindromanan cu tipicamente lo tuma añas pa diagnostica, segun AD ta reporta.

“Nos a duna e computer un tarea: reconoce e sindromanan aki uzando e cara y historia medico di un grupo di mucha cu 40 diferente sindromanan. Esey a bay hopi bon,” Lex Dingemans, ken ta envolvi den e proyecto como studiante di Ph.D., a conta e corant. E model IA a reconoce 37 di e 40 sindromanan corectamente. E algoritmo, cual ta diseña pa e sigui siña y adapta riba su mes, tambe ta yuda conecta sindromanan cu abnormalidadnan genetico specifico.

E invencion ta haci mundo chikito pasobra e model por conecta un mucha di Adelaide, Australia, cu un mucha di Rotterdam cu abnormalidadnan similar. “Sindromanan nobo ainda ta surgiendo, y tin biaha solamente un par caso ta conoci mundialmente,” segun lider di investigacion y genetista clinico, Bert de Vries. Frecuentemente, mayornan sa biba den inciertud pa hopi largo. E invencion nobo aki ta trece nan un stap mas cerca na diagnose rapido. “Esaki por ta un alivio grandi pa mayornan.”

“Tur hende ta capabel di reconoce mucha cu Down Syndrome. Nan ta parce otro mas compara cu nan mesun rumannan. Pero tin varios otro desorden cu ta menos comun,” de Vried a bisa. Pa diagnostica e sindromanan aki mayoria biaha ta tuma hopi aña.

Sindromanan causa pa abnormalidadnan genetico no ta resulta solamente den muchanan cu tin descapacidadnan intelectual suave pa modera, pero frecuentemente cada sindroma tin problemanan fisico y di salud specifico relata na nan. Un bes tin un diagnose, famianan y dokternan por sa kico pa pone atencion riba dje of con pa trata e mucha mas eficiente.

“Un bes bo sa sigur cu un mucha tin un cierto sindroma y cu problemanan di curason of riñon ta sosode mayoria biaha, bo ta mas alerta di esaki. Y si epilepsia ta comun den un cierto sindroma, bo por purba trata e convulsionnan ey mas trempan despues di ser diagnostica,” segun de Vries.