Despues di reunionnan intensivo y extenso, team negociado di Gobierno, lidera pa Minister di Labor, drs. Paul Croes, a logra yega na un acuerdo satisfactorio pa tur partido, principalmente trahadonan di ex Aura Casino. Mayoria di e trahadonan ta bay continua den ‘LIV’, e casino nobo cu ta habri diabierna proximo, permaneciendo cu nan condicionnan di trabou y añanan di servicio. Minister Croes ta gradici tur cu a contribui na e resultado positivo aki, specialmente consorcio local Island Gaming. Di e manera aki por bisa cu e episodio aki ta practicamente tras di lomba, cu hopi les siña y investigacionnan pendiente.
Minister Croes ta gradici tambe e participacion valioso di Mediador di Gobierno Anselmo Pontilius, representantenan di FTA, Rudy Geerman y tambe coleganan Prome Minister Mike Eman y Minister di Finanza Angel Bermudes. “Di e 44 trahado, 26 ta continua den servicio cu tur nan derecho cu tabatin y nan aña di servicio. 15 a firma pa haya cuater luna di pago atrasa cu e otro compania no a cumpli. 3 trahado ta bayendo corte pa busca un pago mas grandi,” asina e titular di Labor a duna di conoce.
Lamentablemente no por a tuma e grupo completo ya cu e casino a reduci su espacio cu casi 60%. Ta bon pa recorda cu tur trahado en cuestion a ricibi for di SVB nan cesantia, cual ta nan derecho adkiri pa e añanan di trabou. Esaki a sosode na luna di mei/juni ultimo. Algun trahado a ricibi sumanan cu ta core den 60 mil Florin y cu sigur a yuda pa yega te awo. Di e mesun grupo di trahado, algun a haya posicion otro caminda caba.
Cu e lesnan cu a siña den e caso di ex Aura Casino, Ministerio di Labor y su departamentonan ta tumando e pasonan necesario cu por evita su ripiticion den futuro y tambe yuda den e proceso di otro casonan cu ta andando.
