Ayera mainta a celebra e desvelo di e logo nobo, como tambe e renobacion di e edificio di Enseñansa pa Empleo (EPE.) Minister di Turismo, Dangui Oduber y minister di Labor, Glenbert Croes tabata presente na e conferencia di prensa pa conmemora esaki.
Enseñansa pa Empleo a wordo funda na aña 1988 y a bira un centro di enseñansa pa e industria di hotelero y turismo. Turismo ta keda e pilar principal di nos economia y Enseñansa pa Empleo ta keda un instituto importante cu ta ofrece cursonan basa riba e necesidad di e mercado laboral y trece educacion popular riba un nivel alcansabel pa tur hende, segun un comunicado di gobierno.
Awendia Enseñansa pa Empleo ta ofrece un variedad di curso riba diferente nivel manera servicio na cliente, bartending, waiter/waitress y esaki ta crea oportunidad pa nos comunidad haya mas conocemento pa por brinda e miho servicio na nos bishitantenan y yuda mantene nos industria di turismo y economia fuerte.
Na aña 2022 tabatin 600 persona cu a sigui cursonan y e aña aki mas di 1600. Danki na crecemento di turismo tin cuponan di trabao nobo den e areanan aki.
Minister di Turismo a indica cu Enseñansa pa Empleo lo habri nan porta na e districto di San Nicolas pa 2024 y asina percura pa mas ciudadano por haya acceso na enseñansa pa por sigui brinda e miho servicio na nos turistanan.
Di su banda, minister di Labor, Glenbert Croes a recorda con a inicia e proyecto di EPE na 1988 despues di ciere di Lago pa facilita e transicion di un dependencia riba industria petrolero na e desaroyo di industria di turismo. E idea di EPE tabata pa yuda trahadornan cu a perde trabao den industria petrolero pa transiciona na industria di turismo.
Minister di Labor a indica cu na 2023, EPE a conta cu solamente dies empleado, cu na 2022 a atende 600 cursista, mientras cu pa 2023 ya ta alcansando 1,600 cursista y cu ta pronostica cu e cantidad ta bay keda aumenta. Igualmente el a indica cu e cantidad di curso a aumenta di 19 pa 27. El a indica cu tambe por a conta cu mas sosten di sector priva.
