Locura na Dimas… Y ken tin e culpa…?

E desorden, innecesario, cu tabatin na oficina di Dimas, ta un bon ehemplo di kico ta spera nos si no tin e debido atencion pa loke ta pasando desde basta tempo caba den e pais aki.

Aparentemente e politica di tolerancia den pasado recien tabata bay asina leu, cu awor nos ta yegando na e punto cu nos por spera manifestacion cu persona indocumenta cu ta bin exigi ‘nan derecho’. Awor, cu hasta un persona indocumenta tin cierto derecho, esey ta un hecho. Si a base di nos leynan ta haya cu nan no mester ta den nos pais, nos mester percura pa nan sali, na un manera ordena, respetando e derechonan cu nan tin como humano. Esey ta implica trato humano completo. Si nan ta deteni, ta toca nan derecho cu tur detenido tin. Si nan ta bira malo o haya un accidente na trabao, mester duna nan e tratamento medico cu tur ciudadano lo a haya. Mescos cu muchanan ilegal tin derecho y deber di bay scol, tanten cu ta permiti e mayornan ta riba nos teritorio. Tur esaki no ta nada nobo, ta e leynan internacional y deriva di nan deriva, nos leynan local cu nos mester aplica. Tur esaki tin como punto di salida, cu si e stranhero ta den bo teritorio, ta pasobra abo a permiti esey.

Sin embargo, parti di e problema ta sinta den e manera descuida cu nos ta maneha ley. Corupcion tambe ta hunga un parti di e asunto aki, y no desde cu a cera un ministro pa esaki. Ta bon conoci cerca mayoria di stranhero, cu Aruba ta un luga unda bo mester percura pa bo yega… e resto ta fix despues. Ta busca un trabao, y despues e tramitenan ta cuminsa pa haya un permiso, di cualkier manera. E panorama ey a cambia? Nos no tin e impresion, ainda. Djis mira cuanto hende desespera ta core yega pasobra a lanta un rumor cu por pidi asilo politico, o por lo menos ta reconoce e status di refugiado, o, mas bunita ainda, ta bay duna amnistia general. E ultimo aki nos por comprende tambe, cu riba rednan social ta circula un video di e actual ministro encarga cu labor y asunto social, unda durante di campaña e ta bisa, sin kita sin pone, cu e ta bay percura pa aministia general pa esunnan cu ta aki.

Na e momento aki nos no ta bay discuti e capacidad di e mandatario pa comprende e materia. Laga nos djis bisa cu e tin un vision un poco inusual riba e asunto aki. En todo caso, e aministia general lo ta pio ainda cu loke e primo a haci cu su dos mil y pico ontheffing. Di otro banda, e ta mandatario awendia y mester desaroya un maneho balansa entre percura pa e ciudadano tin trabao, y di otro banda un entrada ordena di persona di otro pais. Y si ta esey nos ta desea, tabatin bon noticia, supuestamente, den sentido cu polis ta haya e autorisacion atrobe pa para un persona y pidie pa su identificacion. Masha bunita, nos ta haya di tende, awor cos ta bay drecha, pasobra polis si ta bay actua… Pero, señores, prome cu a bin cu e medida pa alivia trabao di polis, cu a resulta den añanan largo polis tabata cu brasa crusa, tur cos tabata color de rosa?

Wel, tabatin hopi aña den pasado cu polis hunto cu otronan tabata percura pa expulsion o deportacion di por lo menos mil persona pa aña… y esey tabata yuda? No, y esey entre otro pasobra den un aña regular, si cinco dunado di trabao di e ilegalnan aki tabata haya un multa, lo ta hopi. Manera e Hulandesnan lo bisa: ‘dweilen met de kraan open’. E practica ey ta bay cambia? Nos ta duda. Pakico nunca nos ta haya estadistica riba e asuntonan aki? Pa tene e practica aki for di bista y conocemento di pueblo?

Pa bolbe riba e asunto di ayera; aki caba nos autoridadnan a faya grandemente. Loke nan mester a haci, como un prome medida, ta atende tur e ilegalnan para dilanti Dimas, naturalmente no den un dia, pero laga nan bolbe y registra nan debidamente. Despues ta bay procesa e casonan, unda nan ta biba, unda nan ta traha, etc. Y despues di debido proceso, ta expulsa nan di nos teritorio, si esey ta e decision adecua cu mester tuma. Y kico a haci awor? A core cu nan, sin cu nos sa ken nan ta, con nan a drenta, unda na ta traha, etc. Si a bay averigua, sigur nos lo a topa cu e hecho cu e gran mayoria a simplemente drenta via aeropuerto como turista y a keda atras despues. Nos ta convenci cu te awe e mayoria ta djis cumpra un pasashi y ta bin Aruba; esunnan cu ta drenta via lama keto bay ta un minoria.

Cu esey nos no ta bisa cu no mester tin debido vigilancia di nos frontera, pero ta importante pa mantene un bista realistico y ekilibra riba e asunto aki. Y ta importante pa nos ‘get our act together’ pronto, por si acaso nos haya miles di refugiado berdadero den nos stoma.