Lockdown na KIA pa motibo di cantidad di caso di Tuberculosis

Recientemente comunidad di Aruba a ser informa di un situacion bastante serio cu tin andando na e instituto coreccional KIA. Minister di Husticia, Arthur Dowers, durante un conferencia di prensa ayera mainta a duna un actualisacion riba e situacion, caminda mester a anuncia lockdown na KIA pa motibo di casonan di Tuberculosis (TBC).

Minister Dowers a splica cu el ser informa siman pasa door di prensa cu lo tabatin diferente caso di TBC den e instituto. Basa riba e informacion aki, e mandatario a tuma contacto cu e instituto y a haya confirmacion cu en berdad tabatin cinco caso na e momento ey.

El a sigui splica cu despues cu diferente instancia a tuma nota di esaki, a cuminsa cu un investigacion mas profundo, a test mas hende y a resulta cu mas hende a resulta di ta contagia. Den e caso aki tabata trata di ocho persona mas. El a indica cu e casonan aki ta asintomatico, locual kiermen cu e persona no ta riesgo hopi grandi pa expande e TBC.

El a agrega cu e personanan ta ser trata y a pone nan hunto den un situacion di isolacion pa asina reduci e riesgo di mas contagio.

Minister Dowers a remarca cu a tuma cierto medidanan den e instituto y un di nan ta cu lo limita bishita di famia, unicamente por busca, por ehempel paña pa laba, pero no por haci bishita ni tin contacto cu e persona, y comunicacion lo bay di manera virtual y no personal.

El a agrega cu contactnan cu corte lo tuma luga di mesun forma pa asina reduci e transporte di hende y e posibilidad pa contamina otro areanan.

E mandatario a indica tambe cu ayera mes lo tabatin reunion cu specialistanan cu ta traha den e tereno aki manera DVG, dokternan di prizon y tambe specialistanan di hospital cu lo atende cu esaki y lo mira si ta necesario pa tuma otro pasonan. Ademas nan lo test mas hende locual lo mester bay determina si e contagio ta mas grandi cu loke te na e momento aki a ser confirma.

Minister Dowers a remarca cu e situacion aki ta uno cu a cuminsa for di december y no ta algo agudo di e momento aki. Sinembargo, el a agrega, e impresion cu e tin te na e momento aki ta cu no a tuma tur e pasonan necesario y corecto, basa riba e informacion cu el a ricibi for di otro departamentonan.

E mandatario a enfatisa cu ta importante pa bin un investigacion riba esaki pa siña for di dje pa futuro.

El a splica cu tin caminda cu e personanan cu tabatin e malesa y tabatin sintomanan presenta, a contamina mas persona. E personanan cu ta resulta contamina aworaki ta den un area isola, pero no por garantisa cu niun otro persona a ser contamina.

Pa loke ta e sintomanan, el a sigui splica cu tin diferente sintoma. Un di e sintomanan y cu ta haci contagio posibel ta e tosamento. Esey ta un di e sintomanan mas importante. Tambe tin keintura, bahamento di peso, entre otro, pero esey lo ta despues di un tempo cu e persona ta malo.

Minister Dowers a enfatisa cu ta importante pa si tin persona cu a core riesgo door cu nan tabata den contacto cu un persona contamina of tabata na KIA, pa nan test. “Esey ta un di e formanan pa reduci riesgo y si nan no tin ningun sintoma, e ora ey e no ta nifica cu nan no lo por ta positivo, sinembargo e chance cu nan ta percura pa contagio, esey lo ta limita,” el a indica.

Un punto cu ta hopi importante, minister Dowers a subraya, ta pa DVG trace e areanan caminda e personanan aki por tabata prome cu nan a ser deteni. El a indica cu un di e caminda cu e personanan aki sigur tabata prome cu nan a yega KIA ta warda di polis, kiermen eynan mester tin un cierto pasonan cu mester tuma.

“Niun hende ta sali for di caya bay KIA, kiermen e personanan aki tabata den detencion na polis, y tambe mester determina si nan ta bata malo e momento ey caba. E indicacion cu tin te na e momentonan aki ta cu parce cu nan tabata malo ora cu nan ta den warda di polis tambe,” el a remarca.

Minister Dowers a sigura cu tur cos aworaki ta ser controla y e intencion ta pa mitiga riesgo y pa tene tur hende mas sigur posibel y brinda mas informacion posibel. El a indica cu tin diferente experto trahando riba esaki na e momentonan aki y nan lo percura pa e informacion yega na e trahadonan tambe y mira con ta reduci e riesgonan.

Pa loke ta trata si DVG y ministerio di Husticia tin bon contacto cu otro pa loke ta e situacion aki, el a menciona cu nan no tin contacto directo cu DVG pasobra esaki ta un proceso cu ta tumando luga den veld y normalmente asina ey cu tur e expertonan den e veld tin cu tuma contact cu otro. El a agrega cu e tabatin contacto si colega minister di salud na momento cu a ser informa di e casonan cu a bin acerca.

E mandatario a subraya cu na e momentonan aki ta purba determina unda cos a bay fout pasobra cu algo asina ta tumando luga ya for di tres pa cuater luna caba, for di su punto di bista tabata importante pa comunica esaki na comunidad.

El a agrega cu lamentablemente ni na momento cu el a haya overdracht el a ser informa di e situacion, locual pa su persona ta algo hopi serio, sobre tdodo si tene cuenta cu mas partido ta envolvi, y ni nan mes tabata sa.

“Ta na momento cu basa riba e preguntanan di prensa, mi a bisa cu no ta bay sconde nada y ta bay ta habri riba e tema aki cu diferente partido. A yama bisa cu nan tambe ta core riesgo sin cu a ser informa na momento cu a bira cla na december cu tabatin contagio. Mi no a haya overdracht ey, e no a bisa mi di esey, no e parti ey specifico, pero mi ta kere cu ta importante cu e no ta bay pa esey so, pero tambe con bo ta comunica na comunidad y mi ta kere cu comunidad tin derecho di sa y esnan cu ta partido den e proceso tabatin derecho di sa loke ta andando y loke nan ta bisando ta cu nan no tabata na altura. Den mi concepto e no ta un proceso cu a cana corecto,” el a indica.