Awe, Dia Internacional di Famia, Tienda di Educacion lo habri nan canal di YouTube, unda lo duna informacion y tips pa mayornan. Su meta ta pa duna enfasis y importancia na cada mucha di famia unda nan por biba feliz.
Corina Linssen, coordinador di Tienda di Educacion, hunto cu Nichole Kock y Noëmi Haddocks ,ambos opvoedondersteuner ,ta esunnan cu a presenta e video promocional cu lo ser lansa dia di awe.
Segun Linssen, no tur mucha tin e chens di biba cu un famia feliz, pa motibo di influencia di famia. Mayornan cu ta pleita y dicidi di separa, esaki por tin un influencia den bida y desaroyo di mucha.
For di 2015, e cifra den separacion ta 52%, locual ta nifica cu hopi mucha ta pasa den e situacion di separacion of divorcio. No solamente esunnan cu ta casa, pero tambe cu ta biba hunto y ta dicidi ‘di no biba bou e mesun dak’.
Den un situacion asina, e mucha ta sinti culpabel, tristesa pa diferente motibo cu nan por enfrenta cune, di ta cu un mayor y sinti falta di e otro. Pa e motibo ey, Tienda di Educacion a dicidi pa haci esaki y duna sosten na mayornan cu ta confronta problema ora di separacion.
Linssen ta agrega cu a pesar di problema, nan tin cu ta consciente cu nan ta keda mayor pa semper, y tin cu keda conecta cu e yiunan. E ta compronde como ex pareha por trece emocion, tristesa, frustracion y desapunta. “Pa e motibo kier duna sosten y yudansa.”
E canal riba YouTube lo pone 6 video unda cu mayor y comunidad di Aruba por wak y sa con pa deal cu e pida cu ta bin dilanti den e proceso di separacion. Eyriba lo tin informacion valido henter dia, y por haci uzo di e tips.
Cu e mensahe aki, nan kier pa e muchanan ta feliz y cu mayornan maneha e situacion bon. “Nos sa cu pa ta un mayor no ta facil, y nos ta aki pa duna e sosten”, Linssen a bisa. Nan lo percura pa keda activo y por pone mas video cada 2 pa 3 luna pa sigui trece mas informacion.
Lo varia den topico manera gaming, pa mayornan sa con pa guia nan muchanan. Tambe desaroyo di sexualidad cu ta un topico dificil pa papia cu yiu. Linssen ta bisa cu no tin mas berguensa manera antes y mayornan ta durf pa papia y puntra ‘menos dificil pa tuma e stap’.
“Nos ta haya mayornan cu ta yuda y motiva otro pa tambe acerca, pa asina nan por wordo yuda. Nan ta keda den e continuacion di cualkier problema cu nan por tin. Tambe ta importante pa ambos mayor tuma contacto, aunke nos no ta obliga ningun hende”, Linssen a splica.
