Ernesto Bermudez y su casa Melanny Blanco ta dos persona cu tin basta tempo yudando esunnan cu tin menos recurso economico y aworaki cu e situacion COVID-19 nan a dicidi di sigui haci esey, cu ayudo di algun compania y persona cu kier duna aporte pa e comunidad.

Bermudez a conta cu e crisis aki ta algo cu ta afecta tur hende. Nan a mira cu cada dia a pesar di tur e restriccion cu tin pa loke ta e COVID-19, como dentista y su casa cu ta yud’e tambe a keda afecta cu e situacion. Nan a adapta nan orario di trabou, pero semper dunando e servicio pa algun emergencia, implementando un protocol cu nan a aplica basta tempo caba prome cu otro coleganan.

Asina mes, el a señala cu cada dia cu ta pasa e ta weita cu cosnan ta birando mas preta. Nan ta hayando cosnan mas dificil, pa via di pashentnan cu ta yega na e consultorio pa algun tipo di servicio cu nan mester, y cu nan a ripara cu nan ta pasando den necesidad.

Bermudez tambe a expresa cu a pesar cu sector priva tambe ta wordo afecta y nan no ta mira mucho alivio ni ideanan concreto di kico ta bay pasa cu e sector aki, tambe tin hende cu no tin trabou y cu ta pasando momentonan dificil. Nan a haya e idea di sigui cu loke nan tabata haci desde algun tempo pasa, cu ta haci donacion pa fundacionnan, pero esaki hunto cu algun comerciantenan y amigonan pa sostene esunnan mas vulnerabel den sociedad.

Despues di yama diferente doñonan di companianan grandi, nan a cuminsa haci saconan cu cuminda. E prome biaha nan a haci 300 canasta cu productonan como lechi, hariña, azeta, aros, spaghetti, bonchi, koffie, te, entre otro cu nan a reparti un siman pasa na diferente luga.

Despues cu nan a haci e entrega di e saconan aki, cu ayudo di Jeanine Rodriguez y Millycent Ras ken ta esunnan cu tin contacto cu e personanan cu mester di dje, Bermudez a comenta cu “nan a bay den un habri y cera wowo”.

Di esaki, Bermudez a trece dilanti cu e dos personanan aki tin un lista y un formulario. Nan ta haci e procedura pa entrega e canastanan via di un number di telefon cu ta 528-4940, e personanan mester yama, inscribi y indica su situacion. “No ta cuestion cu un hende ta yama mi of bin mi cas y busca un saco pasobra nan mester di dje, asina no ta bay”’, el a sigura.

Na e momentonan aki, nan ta den proceso pa haci 400 saco mas pa entrega na diferente districto di Aruba, pa duna pa esunnan cu a keda sin trabou pa via di e situacion aki di coronavirus. Tambe el a menciona cu ta existi hende cu ya caba ta ricibi un ayudo di un fundacion, den e caso aki, nan no ta bin na remarca.

“Loke nos ta haci ta wak cua banda tin mas necesidad, con nos ta organisa den e diferente districto y na base di esey nos ta selecciona y busca e manera con nos lo entrega esey sin cu mester haci un aglomeracion di hende”, Bermudez a bisa.

Bermudez tambe a manifesta cu ‘tur hende ta papia pero no haci nada, nos tur hunto mester aporta pa nos sigui dilanti’. Ademas el a relata cu e idea ta pa nan surpasa e mil canasta, pa via cu aproximadamente 6.000 hende a keda sin trabou pa cu e coronavirus.

“Nos kier conscientisa e hende, duna man, nos no sa cuanto biaha nos por haci esaki pero mientras nos por haci nos lo sigui cune, sin haya nada a cambio” Bermudez a bisa.

Asina mes, el a informa cu el a haci un donacion di 500 mondkap y gloves pa e hendenan cu a pasa cerca di su consultorio un siman pasa.

Pa finalisa, Bermudez a menciona cu si e hendenan kier cu comunidad lo sali dilanti, esey mester bin di hopi mas caminda y no sinta warda kico gobierno of otro instancianan lo haci.

Na e momentonan aki, Bermudez a gradici tur esunnan cu a colabora pa cu e ayudo aki y si algun persona lo kier colabora of duna algo por tuma contacto cu nan via number di telefon 592-9398 di Melanny Blanco.