Recientemente a wordo publica informacion di e cantidad di hendenan cu a aplica pa traha cu Citgo. For di esaki aparentemente 600 local a solicita, y 7000 di Venezuela so, entre otro. A puntra Minister Benny Sevinger como e minister encarga cu Dimas, kico ta bay haci cu e situacion
Den transcurso di otro aña segun informacion duna inicialmente pa Minister Mike de Meza encarga cu asuntonan economico, e refineria lo mester tin 3000 hende trahando. Pues e cantidad di Venezolano cu a solicita pa traha den e refineria, ta un cifra espantoso pa loke ta otorgamento di posibel permiso laboral. Segun Sr. Sevinger e proceso ta cana hunto cu labor, Citgo y refineria di Aruba. E peticionnan cu Citgo haci ta wordo mira door di Departamento di Labor hunto cu refineria Aruba, pa wak e tipo di personanan cu nan ta pidi. “Naturalmente na prome luga ta mira e experticio cu e persona tin, pa mira si tin e na Aruba, prome cu trece un hende di afo. Sinembargo nos tin un protocol cu a wordo firma algun aña pasa cu Valero, y e protocol aki lo wordo re evalua y lo firma un protocol nobo cu Citgo, pa na momento cu esaki habri, e proceso por cana hopi mas miho.”
Cambio protocol
Locual cu Sr. Sevinger ta splica ta, cu normalmente un refineria ora cu nan ta den un ‘turn over’ bo tin mester di hendenan cu por drenta di awe pa mañan. Y no por cana henter e proceso di bay labor wak e permiso etc. y esaki ta dura 1 luna of 2 luna prome cu e haya e oke pa e drenta Aruba. El a sigui splica cu tur esaki lo wordo regla via di un protocol di con ta atende cu personanan cu mester drenta di awe pa mañan y e ora lo skirbi den e protocol tambe con e proceso tin cu cana, ken ta esun cu tin cu cuminsa cu e proceso. Sea ta na labor, sea ta directamente na Dimas, sea ta na refineria Aruba cu ta esun cu mester duna un conseho mas lihe cu ta posibel. Kico ta e periodonan cu esaki tin cu tuma pa por realisa e proceso aki. “E momento cu Citgo habri lo haya e lista di personanan cu nan ta premira cu nan tin mester. Y e proceso e ora ta cuminsa na labor hunto cu refineria Aruba cu lo screen e peticionnan aki. Lo mi a cua ta e personanan local cu a solicita pa e diferente puestonan den Citgo. Naturalmente e persona local ta bin na prome luga y si no tin persona local pa un funcion, e ora lo cuminsa cu e proceso pa mira peticionnan internacional, y lo cuminsa cu e proceso a base di e protocol, pasobra ta papia di un ‘turn over’ cu mester sosode lihe pa e apertura oficial mes. Pa si mi no ta hera cuminsa rafina den 12 luna y algo cu esaki tin cu sosode.”
A puntra minister si e ratio ta conta cu mester tin 80% local y no mas cu 20% trahado di afo den e compania. Sr. Sevinger a bisa cu e no sa ki ratio tin actualmente for di su cabes pero e ta den e direccion ey unda cu mayoria mester ta local. Naturalmente manera menciona anterior, su ta trata di un experticio cu nos no tin na Aruba e ora mester laga e persona bin di afo. Mi no sa si e ratio ta 80-20, pero e mester ta den e direccion ey, e mandatario a termina bisando.
