Tin compania local di produccion di agricultura cu ta pasando tambe den momentonan fastioso, mirando cu compania grandi a cera of cancela nan pedido, manera hotel.

Local Pride Farms ta pa dos aña den mercado. Ashely Krosendijk ta bisa cu e situacion cu ta pasando aden cu pandemia di COVID-19 ‘a dal duro’ pa motibo di cancelacion di pedido. Nan kier avisa pueblo di Aruba cu nan tin produccion.

Actualmente tin tres compania di ‘agricultor na Aruba’. Nan kier pidi pueblo pa cooperacion pa nan producto no bay perdi. “Nos tin suficiente pa crisis. Nos tin e luga capacita pa produci y nos tin bastante producto”, Krosendijk a bisa.

Ultimo tempo nan tabata bende pa compania local. Pa nan e industria di agricultura no tabata existi como un forma di comercio, sino manera un hobby. Segun Krosendijk nunca a wordo practica.

E ta bisa cu ta un mercado dificil pa eherce. Pa nan crece den e mercado no tabata facil, pero a keda positivo y a bay bon. Sinembargo pa circunstancia cu tin cu e crisis mester a cambia ‘dal un buelta por completo’. Pa nan mercado no stop, nan mester cuminsa suministra pa comunidad. Nan tin produccion pa siman manera lechuga, kale y cilantro ‘manera tin simia nos ta planta y produci henter aña’.

A puntra si den caso cu yega na un punto cu barco no bin cu produccion di berdura y nan lo mester bende nan produccion, lo tin un control of limite pa famia? E ta contesta cu ainda no lo ta e caso pa bin cu limitacion, pasobra no tin bista di locual por pasa.

Sinembargo ta bisa cu lo prefera pa cumpra den grandi y no ta kere cu famia lo cumpra tur cos, pero ta bisa cu ta mas eficiente pa cumpra den grandi y siguransa cu tin nan producto pa siman.

Nan ta haci un yamada na comunidad cu si nan tin mester di producto local ‘traha di tera’ y cu no ta bin di exterior, por acerca nan y tuma contacto pa haci nan pedido. Nan lo ta dispuesto pa haci entrega.

Mirando cu ta producto organico. nan ta bisa cu e prijs tin biaha por sali un tiki mas caro; pero nan ta miho calidad, pa motibo cu nan no por compara nan mes cu producto importa. “Ora cu haci pedido den volumen halto ta pasa cu ta baha prijs, e ta pone cu nos prijs sali centjes mas caro.”

Sinembargo e ta bisa cu calidad ta miho y ta bon pa sostene industria local. E ta splica cu ta sali mas pa motibo di gasto operacion y ta producto fresco, cu ta cla pa haci uso di dje. Nan ta producto fresco cu cliente ta beneficia di dje.

“Nos prijs nan lo keda mescos, ban bisa un lechuga ta costa 3.50 florin, lo mantene esey. Nos sistema ta draai eficiente riba awa y coriente. Nos ta purbando di crea un mercado local pa nos por keda riba e plan di expande y por tin mas producto”, e ta splica.