Ayera atardi a tuma luga e tratamento di apelacion di e caso Avestruz den Corte di Apelacion. Segun informacion publica pa e portal di noticia local Noticia Cla, corte di apelacion a reserva segundo siman di luna di mei otro aña pa trata e caso di apelacion Avestruz.
Ayera tardi durante e ‘regiezitting’ e tres huesnan di e corte a informa e abogadonan di e shete sospechoso den e caso, cu ta wordo scucha un biaha mas den apelacion. Ta trata di e sospechosonan Benny Sevinger, Pieter Sussebeek, Carlo Mansur Jr, Maria Leoncita Arends, Ninuska Nuñez, Edgar (Gabby) Werleman y Curt Harms.
Segun e portal ta indica, cuater di e shete sospechosonan a apela parti di nan sentencia, mientras cu Ministerio Publico a apela sentencia di tres sospechoso.
Durante e tratamento di e caso ayera atardi, e abogadonan por a presenta nan deseo pa nan cliente y dos abogado a pidi pa scucha dos testigo mas, esta L. Harms y A. Fowler. Fuera di esaki, tin cuater otro testigo cu ya caba a wordo solicita pa wordo scucha den e caso, pa e caso di sospechoso parlamentario Benny Sevinger.
Segun Noticia Cla ta informa, e abogado Demis Illes a splica cu e dos testigonan nobo aki por duna claridad riba e asunto di e gym na cas di e sospechoso Sussebeek, y tambe e bendemento di tereno na Sussebeek, cual ta un di e acusacionnan.
Ademas di esaki, abogado di sospechosonan Nuñez y Werleman, Rudy Oomen, a pidi pa un testigo, den e caso aki un notario, pa loke ta e proceso di traspaso di tereno erfpacht, unda cu kier demostra cu na ningun momento e clientenan no a mal informa Gobierno di Aruba di nan transaccionan.
Tur peticion cu a wordo realisa,lo wordo considera pa e tres huesnan cu ta bay trata e caso otro aña y dia 20 di september 2or di atardi ta bay tin un sentencia riba e peticionnan entrega. Manera indica e caso mes ta programa pa cuminsa otro aña y e fecha specifico lo ta dia 13 di mei y a reserva full e segundo siman di mei, pa trata e caso, pero tin posibilidad cu e planificacion por cambia ainda.
