Lo traha un plan pa cunukeronan haya awa mientras molina di Savaneta no ta operativo

Debi na un accidente cu a tuma luga den fin di siman, e molina di awa pa cunukeronan di Savaneta ta for di servicio na e momentonan aki, un molina cu hopi balor pa esnan cu ta dedica na agricultura caminda minister encarga cu Sector Primario a duna su declaracion riba e situacion aki.

Dialuna ultimo, Fundacion Santa Rosa a traves di nan rednan social a informa cu molina di awa pa cunukeronan ubica na Savaneta no ta disponible na e momentonan aki debi cu ta parce cu un auto a perde control, dal e molina, kibr’e y despues e molina a cay riba e auto mes.

Pa esaki, Bon Dia Aruba a puntra minister encarga cu Sector Primario con largo e proceso ta bay ta pa e molina di awa lo keda cla y si lo pone e chauffeur responsabel pa e dañonan cu a wordo haci, e mandatario a contesta cu el a haya e notificacion for di Santa Rosa ora e incidente aki a sucede “mirando cu nos ta den proceso pa pusha sector primario haciendo pasonan grandi como pais riba e sector aki, esaki ta un situacion cu ta ‘set back.’ Mi ta spera cu e persona envolvi den accidente no a ser lastima y cu por recupera pronto. Pero mi a bisa mi director ban traha un plan pa asina pone e molina aki den funcion lo mas pronto cu ta posible.”

Minister Arends no a duna mas detaye di cuanto tempo esaki lo tarda, pero a sigura cu ora e lo tin mas informacion e lo comparti esey cu comunidad.

“Mientras tanto nos tin cu wak con nos lo provee nos agricultornan cu awa temporalmente tanten cu e molina lo ta back den operacion.”

Pa loke ta trata e dañonan na infrastructura cu e chauffeur a causa, minister a menciona cu “esaki ta reglanan di trafico cu ta vigente tambe den caso aki, esaki ta algo lamentable pero e leynan di trafico ta esun cu ta atende cu esaki,” el a expresa.

Di su parti, Santa Rosa a comparti un video y un escrito cu un di e persona afecta a publica caminda el a expresa loke e molina di bienta ta nifica pa nan “den dia y anochi laat marduga. Tur ora bo yega e ta cla para pa coopera pa nos tin awa pa usa pa e matanan pero tambe pa bestianan y algun otro necesidad na cas cu tambe ta warda riba e awa. Inespera un auto a bin dal’e, kita, cay na suela, tur kibra y dobla. Hopi tristo pa mira,” e persona a conta.

Santa Rosa menciona cu “pa esnan cu no ta compronde e balor di un molina di awa pa cunukero, lesa pa boso mes. No preocupa, Santa Rosa lo haci tur lo posibel pa instala uno back pa yuda tur e cunukeronan cu ta depende di e pos aki.”