Lo reuni cu doñonan di negoshi cu no cumpli cu protocol; Team reforsa lo bin cu control severo riba establecimentonan

Tin protocol pa tur cos, pero unda e control a keda? E pregunta aki ta surgi ora cu nos por mira den social media cu establecimento nocturno no ta tene nan mes na e reglanan basico pa evita mas contagio di Covid entre nos propio poblacion, awor cu nos tin 12 caso activo. E hecho cu nan no ta exigi na nan clientenan ta un cos. Pero ni sikiera na ta hacie cu nan propio trahadonan.

Bon Dia Aruba a trece dilanti e preocupacion aki cerca minister di Husticia, Andin Bikker, mirando cu tambe e ta carga un parti di e responsabilidad riba e tereno aki. E mandatario a admiti cu e preocupacion aki ta uno valido. Nan por a tuma nota tambe cu durante e fin di siman berdaderamente nan por a wak cu personanan ta lubida cu nos tin e reto di Corona virus. Pero cu e hendenan mes di e establecimento no ta tene nan mes na e reglanan basico.

Den cuadro di ley, gobierno a bin cu protocolnan obligatorio. Den esaki cada doño di establecimento tin un responsabilidad pa tene nan mes na e reglanan di distanciamento social. Tambe pa e clientenan cu ta bishita nan negoshi tene cuenta cu e protocol.

Segun e mandatario pa atende cu e situacion aki nan ta ampliando e team di control. Esun encarga cu esaki ta minister di Salubridad, Dangui Oduber, caminda e team ta resorta bao dje. Minister Bikker a anuncia cu pa medio di e team aki lo bin control severo riba establecimentonan.

Tambe nan ta bezig cu reunionnan interno cu diferente establecimento cu nan ta ripara cu nan no ta cumpliendo cu e protocol manera ley mes ta prescribi. E intencion ta pa nan combersa cu e doñonan di e negoshi y mustra nan responsabilidad.

El a bisa cu den dje tin aspecto di mantencion di ordo, caminda nan por cuminsa duna boet. Pero tambe e ta kere cu tin un responsabilidad riba e propio establecimento. Ya cu nan mester mir’e cu aworaki nan tin espacio cu nan mester probecha pa nan por genera algo di entrada. Pero si nan ta bay cuminsa reparti boet y cera establecimento, practicamente ta bira cu shen porciento di nada ta nada.

E mandatario a destaca e trabao cu e team di maneho di e Covid crisis ta bin realisando, pasobra e sistema control den aeropuerto pa detecta e virus ta funcionando. Ya cu nan ta detectando personanan cu a bin cu e virus. E ta cualifica como un balansa entre keda mantene e fronteranan cera cu e consecuencia cu nos economia no ta reactiva. Of esun di bin cu un control severo na entrada di nos frontera. “No mester panikia ora cu bin un of dos caso cu a wordo detecta na aeropuerto,” el a bisa.

Mester tene cuenta -segun e mandatario- cu e virus t’ey afo, pero nos a bin cu un sistema di control pa nos pais gradualmente por haya un reapertura di nos industria turistico. Esaki no ta descarta e probabilidad cu un persona of mas cu ta bin di afo lo por tin e virus.

Igualmente e mandatario a subraya cu estadisticamente nos ta hopi abao di loke a wordo premira teniendo na cuenta loke otro pais a pasa aden ora nan a cuminsa habri nan frontera.