Lo remplasa vouchernan di cuminda pa debit card

Seguro nacional AZV a haci un evaluacion y dicidi cu lo cancela e uzo di voucher na Cali, Colombia y bay over na un debitcard.

AZV na comienso di e aña aki a tuma e decision pa traha cu ‘voucher en bes di duna pashent y famia cen pa cubri gasto. Sin embargo, despues di un periodo di prueba y un evaluacion awor e instancia ta dicidi pa bay over na e introduccion di debitcard.

E motibo pa cambia AZV no a duna. Pero Bon Dia Aruba ta consciente cu tin hopi keho riba e sistema di voucher di pashent y famia cu ta bisa cu e sistema aki no ta funciona. ‘ Por ehempel por uza e voucher na luganan di come limita unda por ehempel e prijsnan ta asina halto cu e suma nunca ta yega pa cuminda. Awor pashentnan cu ta bay Cali lo haya e compensacion financiero den forma di e debitcard. “Lo por haci uzo di e debitcard den e cantina di e hospital, na diferente restaurant y of supermercado.

Ta keda liber na e asegurado si ta haci uzo of no di e debitcard ofreci door di AZV. AZV ta convenci cu pa medio di e introduccion di e debitcard e ta cumpli cu su servicio na su asegurado dunando e mas opcion awor compara cu e sistema di voucher”, asina e compania di seguro ta informa.