Minister di transporte:

Minister di transporte, despues di su bishita na Hulanda, a logra yega na palabracion pa colabora hunto cu Connexxion di Hulanda. E compania lo yuda transporte publico den e parti di legislacion, bin cu rutanan nobo y mas efectivo y posiblemente un sistema di bus on-call.

Mirando como a detecta problemanan cu e flota di busnan na Arubus, minister di transporte y comunicacion Chris Romero (MEP) a splica cu den su biahe pa Hulanda nan a bin na acuerdo cu un compania cu nan lo trece 9 bus uza pa Arubus.

”Mirando cu nos sa no ta temponan facil, mi persona a tuma contacto cu Connexxion, cual ta un compania di transporte publico grandi na Hulanda, pa asina mira e posibilidad pa nos haya busnan di nan cu no ta bay ta den servicio mas, pero si den bon estado y cu airco pa un prijs mas barata.

“Esaki ta un fase transitorio unda nos por haya 9 bus. Esaki en bes di 1 bus nobo.” Esaki lo ta e prome stap segun minister pa bin cu busnan nobo, te cu por bin cu e opcionnan necesario di bin cu busnan ‘reconoci’.

Ademas di esaki, den e reunionnan na Hulanda Connexxion, a ofrece pa yuda Aruba cu e parti di ley pa loke ta trata transporte. “Busnan na Aruba no tin e ley preferencial manera cu tin na otro paisnan. P’esey nos kier duna Arubus e preferencia pa asina nan por brinda un miho servicio.”

Aunke esaki ta un bon iniciativa pa bin cun’e, por mira cu riba e aspecto di ruta di Arubus tin ciudadanonan cu no por haya manera pa yega na unda nan tin cu yega. Por ehempel un persona residencia na San Nicolas cu mester yega Paradera. Pues nos a puntra minister riba esaki, unda cu su reaccion a indica cu esaki tambe tabata parti di e charlanan cu Connexxion.

”Ora bo compara nos cu cierto ciudadnan of islanan rond di Hulanda cu tin e ekivalente di nos poblacion, ta uza un otro sistema di bus. Nan ta core bus, pero nan ta haci esaki di cierto manera cu bo tin adernan cu ta pasa di punta pa punta y djey ta crea otro conexion na banda di esaki. Cu esaki sigur nos ta wak e cambionan cu nos mester trece.”

Specialmente pa loke ta trata e frecuencia cu cual hende ta core cu bus mester tene cuenta cu esaki. E minister a duna un ehempel ora un bus ta core den un ruta menos comun unda pa dia podise 2 persona ta subi riba un bus grandi, mientras por a haci esaki cu un bus chikito. “Bo por haci esaki na cierto ora, pero tambe bo por haci esaki on-call. E tipo di cosnan aki nos kier bin cun’e y cu esaki Connexxion lo bay yuda nos.”

Na final minister a subraya cu mester mira bon e data cu tin riba e suheto di transporte publico unda por bay mira si en berdad hende ta core cu tal ruta. “Despues cu nos mira e datonan bon nos por cuminsa bin cu rutanan nobo.”