Ayera director di hospital Horacio Oduber, sr. Ezzard Cilie a brevemente trece dilanti cu e poblacion lo mester custumbra cu klasse verzekering manera cu nan ta conoce no ta bay existi. El a laga sa cu lo informa mas riba esaki den e transcurso di otro siman. E director a enfatisa cu hospital no ta bay haci diferencia den trato medico den cuadro cu e edificio nobo.
Sr. Cilie a bisa cu tur adelanto tin su parti bon y tambe su desbentaha. E trabao pa reorganisa henter e departamento y specialismo cu tin den cas no ta uno facil. Esey ta determina con bo ta reparti bo departamentonan. E prome cos cu hospital a topa cu ne, a dicidi cu no ta bay haci discriminacion den e cuido medico cu nan ta duna. Esey ta nifica cu e ‘klasse verzekering’ probablemente lo bay stop segun e director pasobra nan no ta haci distingi den e cuido medico cu bo ta ricibi, no por haci esey pasobra ta discriminacion.
“E parti nobo ta reparti den specialisacion tambe y no reparti den diferencia di clase di hende. Ta p’esey tambe el a wordo construi pa e ambiente den cual cu bo ta, e ta duna bo un impresion tambe di ta un klasse afdeling. Anto awo nos ta mirando kico nos por duna adicional pasobra e clientenan aki ta keda existi y nan lo keda reclama cerca nos pero pa aworaki nos no tin espacio pa esey,” sr. Cilie ta bisa.
Ningun diferencia den trato medico
Hospital no a keda cla ainda riba kico lo considera Klasse Verzekering pero nan a enfatisa si cu nan no lo haci diferencia den e trato medico cu lo wordo duna. Tur mester haci e mesun trabao. “Corda bon cu aworaki nos ta den construccion. Nos ta den mudamento. Pa e proximo dos aña nos no ta cla. Nos tin cu haci tur tipo di adaptacion aworaki djis pa motibo cu nos ta den construccion aworaki,” e director ta bisa.
E ta sigui bisa cu e poblacion mester custumbra cu klasse verzekering manera cu nan ta conoce no lo existi mas. “Si bo bini akinan bo mester tin suerte cu bo ta cay den grupo cu si lo por bay, e parti nobo ey no ta existi mas. E ta di importancia pa menciona pasobra tin algun di e hendenan aki tin e seguro aki for di nan doño di trabao pues mester evita pa e hendenan aki no bay paga locual nan no ta ricibi.”
Manera menciona, hospital lo bini cu mas informacion den transcurso di otro siman y lo cuminsa duna tur e pashentnan aki un foyeto unda cu e informacion aki ta describi den dje. “E servicio medico ta bay keda mescos, nos no mag discrimina den esey,” e director ta comenta. Mientras cu ta mudando nan mester wak con nan ta haci pa complace locual e peticionnan ta pasobra hospital tambe tin cu custumbra.
“Meser corda tambe cu un pashent aworaki pa cada metro cuadra e tin dobel di locual e tabata tin den e edificio bieu. Su privacidad tambe ta dobel di locual e tabata tin den pasado,” el a agrega.
