Un di e reformanan mas importante pa yuda Aruba logra un nivel di economia y bida mas halto ta den enseñansa. Pero netamente den enseñansa awor tin hopi demotivacion pa motibo cu tin e recorte di salario di 12.6 porciento. Segun Alexandra van Huffelen, Secretario di Estado pa Asuntonan di Reino, e ta reconoce cu e recorte den salario ta haci dolor. Y a papia riba e tema aki cu e sindicatonan tambe durante su bishita na Aruba.
“E ta hopi doloroso pa entrega parti di salario, sigur si esaki no ta suficiente. Pero mi ta aprecia cu ta dispuesto pa haci sacrificio na beneficio di Aruba.” E Secretario di Estado a bisa cu durante e combersacion cu sindicatonan, a informa nan cu tanten cu Aruba ta ricibi sosten di emergencia, e ta importante pa keda critico na e salarionan y e recortenan. Pero e ta posibel si pa mira con pa bin cu alternativa pa e suma cu ta entrega. Esey lo mester sosode den deliberacion cu otro, pa duna perspectiva. Por ehempel cu na momento cu no mester mas di e sosten, cu por duna un salario mas amplio atrobe. “Mi ta compronde cu e ta fastioso, mester wak na alternativa y cua ta e perspectivanan pa futuro, pasobra enseñansa ta sumamente importante. Sin un bon enseñansa ningun pais lo por tin un futuro floreciente.”
Gasto di personal di Gobierno
Di otro banda, mientras cu a pone como condicion cu mester reduci 60 miyon di gasto pa AZV, no a mara un cifra concreto cuanto Gobierno mester baha su gasto. “Un di e aspectonan importante pa un pais, no ta solamente un aparato publico cu ta traha, pero uno cu ta eficiente.
Nos lo traha hunto pa mira con pa realisa esey. Na prome instante ta Aruba mes mester haci e trabou ey, pero un aparato publico mester ta eficiente pa crea un bon clima di inversion.” Prome Minister Evelyn Wever Croes a bisa cu den e Rijkswet Aruba financieel toezicht, RAft a determina cu e gasto di salario publico mester ta na 10 porciento di e Producto Interno Bruto, GDP, y esaki mester keda logra na 2027. Den e RAft a palabra e normanan presupuestario, cu ta nifica cu pa 2023 mester tin un surplus di un porciento di GDP riba presupuesto. “Awor aki nos ta algo mas cu 11 porciento di GDP pa loke ta e gasto di salario publico. Pero nos tin e Plan di Maneho di Personal, BVP2 cu ta pa baha e porcentahe di 11 pa 10 porciento. Mi mester bisa si cu nos ta un poco riba 11 porciento cu e recortenan. Si mester duna e 12. 6 porciento back na salario, anto e porcentahe ta subi mas ainda.”
Prome Minister a sigura cu e recortenan no ta permanente pero e ta mas bien pa ilustracion. Di otro banda, tin cinco aña pa reduci e gasto di personal na forma organico. No dor di kita cantidad di hende for di sector publico, pero si door di elimina servicionan cu en realidad no ta pertenece na Gobierno. Tur e revision y investigacion ta sosodiendo awor aki den cuadro di e landspakket y asina cu e estudionan ta cla, nan lo keda publica.
Cantidad di personal publico a baha caba
Pero en todo caso, basa riba e norma di gasto di personal cu ta parti di e protocol entre Hulanda y Aruba di 2018, e cantidad di personal publico a cay cu 13 porciento desde 2018. Segun e Prome Mandatario, problema di e aparato publico di Aruba ta e sistema automatico di aumento di salario, e bezoldigingregeling, cu ta nifica cu hasta si mantene e mesun cantidad di hende den servicio, toch e gasto di personal lo subi pasobra nan ta haya promocion automatico. A para esey, cu a nifica cu a logra baha e gastonan cu 12. 3 porciento.
“Nos no ta unda nos mester ta, pero nos ta riba e bon caminda. Nos a baha personal den cantidad di hende, y nos a baha e gasto di personal tambe.” E proceso aki ta keda controla cada tres luna y ta aparece den reportahenan di ehecucion cu ta bay pa CAft. “E gastonan di personal cu nos a palabra e tempo ey, y tambe e limite di 10 porciento di GDP ta un reduccion balansa. Por ehempel, si cinco miembro di Cuerpo Policial bay cu pensioen, no ta nifica cu no por bin cinco otro agente policial acerca. Dus por tuma hende den servicio, basta cu tin mas cu ta bandona e servicio. “E ‘minnan’ mester ta mas grandi cu e ‘plusnan.’ Esey ta e palabracion riba gasto di personal cu nos a haci y ta un di e condicionnan di e sosten di likides,” Prome Minister Evelyn Wever Croes a bisa sigurando cu Aruba ta cumpli cu e normanan di personal palabra.
