Pa motibo di tanto accidente cu a bin sucediendo na crusada di Sero Pita, den evaluacion entre Cuerpo di Polis di Aruba conhuntamente cu DOW a dicidi di coloca 2 verkeersplateau temporario riba e “high way” pa asina purba di evita mas accidente.

Departamento di Obranan Publico a señala cu esaki “ta bay ta un alivio temporario pa crusada di Sero Pita.” Despues di a evalua conhuntamente cu Korps Politie Aruba a dicidi di pone 2 verkeersplateau temporario riba e “high way” na e crusada di Sero Pita.

Debi na esaki, automobilistanan mester tene na cuenta cu for di awe entre 8:30 di mainta te cu mañan 25 di juli pa 4or di atardi e trabaonan di colocacion di e 2 verkeersplateau ta bay tuma luga.

“Mester menciona cu normalmente nos no ta pone verkeersplateau riba high way, pero mirando e tantisimo accidentenan cu ta surgi na e crusada eynan a dicidi di pone 2 temporario. Pa aña 2025, nos lo construi un rotonde pa asina alivia e crusada por completo. Mas cu claro esaki tambe mester bini cu ayudo di tur a automobilistanan pa baha velocidad ora ta coriendo riba e caminda di Sero Pita,” e departamento a indica riba su rednan social.

Sigur algo cu lo por disminui e cantidad di accidente cu anteriormente a tuma luga, pero pa hopi hende esaki no ta nifica un solucion y mucho menos cu un rotonde sino mas bien ta papia di e chauffeurnan mes cu pa algun biaha ta core di manera iresponsabel y no ta tene nan mes na reglanan di trafico.

Por ehemplo, pa algun usuario di Facebook e cual a duna su comentario riba e tema, el a bisa cu “Asina nos lo keda babysit chauffeur? asina ki ta con ta bay para cu nos suspensionnan di auto??? Ken ta bay paga pa shocks y springnan cu constante ta riba tension bo a wak Parke Curason? e caya ey ta un desaster completo. Mi kier wak un asistencia di bida pa un ambulance anto tur e fraccion di seconde cu ta conta pa un bida con e lo ta e ora algo pasa eybanda ken lo mester demanda !!! Dis pasa un ley no ta costa placa, mes esun cu causa accident inresponsablemente ta perde rijbewijs y auto cla. Bo lo wak tur hende comporta.”

Den esaki, tambe tin cierto ciudadano cu ta solicita pa pone mas atencion riba otro camindanan cu mester di asfalt of un rotonde mes.

Potret ta mustra un di e accidentenan cu a tuma luga den crusada aki.