Ayera premier Evelyn Wever-Croes(MEP) tabata tin su prome reunion cu prome minister di Hulanda Mark Rutte. E reunion aki tabata uno via telefon. Via un comunicado e ta declara na prensa un poco riba e dialogo aki cu a toca varios tema, entre otro con e traspaso di gobierno a bay y riba e situacion financiero.
Minister Wever-Croes a bisa cu na prome luga minister Rutte a expresa convivencia y condolencia pa henter e comunidad di Aruba en general, en especial e famia di Rishandroh y Eugene cu e acto asina lamentabel. Ayera a keda declara dia nacional di luto na Aruba en cuadro cu e caso lamentabel aki.
Deseo di minister Rutte segun premier Wever-Croes ta cu comunidad di Aruba haya paz sabiendo cu gobierno di Aruba lo haci tur su esfuerso hunto cu instancianan den area social pa percura cu tur condicionnan wordo cumpli cu ne pa algo asina no bolbe sosode.
A surpasa problemanan inicial
“Nos a papia tambe di e forma con nos a encontra gobernacion. E traspaso sin informacion, sin ekipo y sin por a cuminsa goberna manera tur otro pais cu ta respeta su mes,” premier Wever-Croes a bisa.
El a enfatisa si cu el a laga minister Rutte sa cu nan a surpasa e problemanan inicial aki caba y ta reconstruyendo tur e documentonan cu nan no a haya pa asina por atende cu nan debidamente.
“Mes momento mi a segure tambe cu nos ta bay percura pa den futuro, cualkier gobierno cu tuma over ta haya un traspaso responsabel. Cu djis un cambio di un password y asina haya tur informacion. Pa asina nos garantisa tambe cu e historia di gabinete Wever-Croes keda registra pa semper,” el a sigui bisa.
Tema financiero
E otro tema tambe basta importante cu e mester a toca cu minister Rutte tabata naturalmente e situacion financiero di Aruba. E mester a bisa minister Rutte cu na tur probabilidad, segun e consehonan cu nan a haya di CAFT tambe, no lo por cumpli cu e exigencianan den ley manera nos a trece dilanti pa loke ta trata e finansas publico di Aruba. A splica e mandatario Hulandes riba e forma cu gobierno anterior a laga un deficit di riba 50 miyon atras adicional pa e aña aki y riba dje a bin un deficit aworakinan di 60 pa 70 miyon adicional pa motibo cu e refineria no por cumpli cu su pagonan na gobierno di Aruba.
“Esaki ta haci cu nos tin un desafio financiero hopi grandi pa Aruba otro aña di casi 200 miyon. Pero mi a segura minister Rutte di con nos ta trahando un plan y trayectoria riba con nos ta bay bek riba e curso corecto. Sin cu esaki ta bay pone un peso demasiado grandi riba nos comunidad.”
Segun premier Wever-Croes, minister Rutte a aprecia cu ya Aruba mes ta tumando iniciativanan pa prepara un plan. A splica minister Rutte cu unabes e plan ta cla, lo kier reuni cu nan pa asina yega na un palabracion concreto riba kico lo ta e caminda pa sigui pa dilanti.
‘Bon relacion den Reino a base di madures’
Premier Wever-Croes a reitera e importancia di tin un bon relacion den Reino, expresando cu: “Manera mi a bisa semper, nos vision tabata semper pa tin un bon relacion den Reino a base di respet mutuo y madures. Pasobra nos como pais tin cu atende cu nos mesun problemanan nos mes, y si nos no por nos lo bati na portanan di Hulanda.”
E mandatario ta sinti cu e espacio ta wordo duna for di Hulanda pa Aruba por cuminsa atende cu e retonan den un gobernacion nobo. “Mi ta considera esaki awe un punto hopi importante cu ta yena nos cu mas speransa y confiansa pa atende cu e tema financiero di pais Aruba na un forma responsabel.”
