No semper ta bay hunto
Atrobe e amienda den nos Codigo civil ta bira obheto di discusion. Esey mientras e amienda, y e Codigo nobo a keda aproba caba. Loke ta resta ainda ta e ley di implementacion (Invoeringsverordening), cu mester bin parlamento ainda. Y ta esaki un (of mas) parlamentario di MEP a tuma como oportunidad pa haci un ‘statement’. Un por cierto contrario cu esun cu nan a haci dia di votacion riba e amienda, unda practicamente a ‘duna un man’ na partido di gobierno, cu no tabatin e votonan den cas pa por pasa e proposicion di un di nan parlamentarionan. Si no tabata pa e tres votonan di partido MEP, y e dos di PDR y miembro independiente Marisol Tromp, lo no tabatin amienda.
Aki a papia e curason noble, unda a laga cada miembro di parlamento vota segun nan consenshi. Nos tabatin e leve impresion cu e idea ta cu semper nan mester vota asina, pero experiencia den pasado ta mustra cu disidencia na momento inapropia ta saca tur cuchiu y pistol pone riba mesa. E ora si no tin nada di consenshi. E ora si ta ‘disciplina di partido’ ta manda, ademas cu ta recorda e parlamentario cu un par di dozijn di voto cu ta di pasahero e ta den parlamento y cu e asiento no ta di dje, “ta di e partido e ta”. Te awe ainda aparentemente nan no a logra traduci e frase di nos constitucion cu ta bisa cu e parlamentario ta vota “zonder last ”, es decir cu nan ta liber pa vota semper manera nan ta haya ta bon. Pero bon, curason noble a papia y a yuda fraccion di gobierno pa nan keda cla cu e amienda, evitando cu nan lo a haya problema interno y cu nan hendenan, pasobra cada ken a keda liber pa vota segun nan opinion.
Henter e bochincha cu a bin despues aparentemente a dal partido MEP hopi mas duro cu e partido den gobierno; hasta mester a pone reunion cu su base pa trata duna splicacion. No ta solamente e topico mes y e diferente puntonan di bista tabata hunga un papel, sino tambe e posicion ‘noble’ pero tambe naief, yudando un contrincante politico cu nunca ta laga ningun oportunidad bay perdi pa tranca proposicion y humiya e contrincante opositor. E pregunta grandi tabata kico e partido grandi den oposicion por ta debe e partido den gobernacion cu nan ta saca man yuda nan manera bon Samaritano, causando problema pa nan mes y resolviendo problema di otro.
Ta parce cu awor a mira cu esaki en berdad ta ‘noble’ pero politicamente no sensato y ta gara e tratamento di e ley di implementacion como arma pa logra trece desunion den e partido den gobernacion. Pero esaki ta mustra mas facil cu e ta. E ley di implementacion (invoeringsverordening) no ta trata di e amienda(nan) so, sino henter e pakete gigantesco di cambio cu a haci den e Codigo Civil, y cu ta abarca un sin fin di asunto, cu tambe ta importante. E posibilidad grandi ta cu trankilamente henter e fraccion di e partido berde ta vota pro e ley, cu e argumento cu ta trata di henter e pakete y no solamente di e amienda encuanto reconocimento di derecho di personanan den relacion di mesun sexo. Y kico ta e consecuencia? Cu nan ta keda bon cu nan base, inclusivo esunnan cu ta pertenece na e grupo beneficia cu e cambio di ley aki, mientras cu e partido grandi di oposicion a bolbe haci algo cu ta lanta e sospecho cu nan lo ta contra di e amienda aki. Pero, bo no a dicidi mas tempran den aña cu bo no ta tuma posicion como partido, anto awor bo ta bay hacie ‘after the fact’?
Ta dificil pa mira ta ki meta como partido ta sirbi cu e ‘move’ aki di un parlamentario riba su mes, sin cu aparentemente e asunto aki ta bon discuti internamente. Como partido politico serio, y no tin duda cu e partido aki lo ta desea di ta y demostra esey, ta dificil pa na e momento aki bay actua asina, mientras cu no ta ni sigur mes cu e division cu tabata core den e partido berde tempo di e amienda, lo t’ey ainda. Pa e simpel motibo cu e biaha aki si, esun cu ta kere cu e por vota contra un ley tecnico di introduccion, por conta ariba cu proximo eleccion e por bay busca un otro lista pa subi.
Contal cu, resumiendo tur cos, ta dificil pa kere cu na e altura aki por saca beneficio politico di e asunto di e amienda. Por ta cu tin persona den e base di partido cu lo keda contento cu e posicion tuma awor, mas vale tarde cu nunca, pero probablemente esey no ta bay para e introduccion di e ley concerni. Campaña ta aden caba, y tur cos cu ta sucede di awor en adelante, mester mira cu e bril di eleccion. ‘Smart moves’ ta importante, aunke ta dificil pa mira esey den e caso aki.
