President di Parlamento Mervin Wyatt-Ras ta informa cu Parlamento lo tin reces entrante dialuna dia 10 di juli y lo termina dia 16 di augustus awo. Esaki ta conta pa tur Parlamento di tur pais den Reino.
Durante e periodo di reces lo no tin reunionnan publico di comision ni di otro indole. Sinembargo trabou diario Parlamentario lo sigui dependiendo di e Parlamentario.
Segun sra. Wyatt-Ras e temporada tras di lomba tabata uno cu hopi a wordo haci. Entre otro siman pasa a trata 5 ley riba un solo dia, entre nan e ley pa e trahadonan di Setar por haya pago cu nan a warda 14 aña p’e. Otro ley cu a wordo trata tabata e ley di aumento di pensioen di behes, cual ta representa un aumento di 25 florin pa un pensionado soltero y 42 florin pa un pareha. A trata tambe e ley cual lo duna rebaho di 35% riba pago di fiansa di estudio ora cu e studiante paga su debe den un solo pago.
Tambe e rebaho riba impuesto ora cumpra un cas di antes cu ta monumento, tanto kita e impuesto di traspaso como rebaho. Ademas e ley di mas supervision door di Banco Central pa ‘wisselkantoren’. Tin un par di ley mas cu tin cu prepara pa ser trata despues di reces.
Durante e reces tin cierto trabounan cu lo ser haci den sala di Parlamento pa loke ta trata entre otro airco.
