Lo no persigui e tres polis den caso Mitch Henriquez

Lo no persigui e tres polisnan cu a sali liber den e caso di Mitch Henriquez. Asina corte na Den Haag a dicidi ayera. Esaki nos partner den noticia, Ret Karibense, a duna di conoce.

E famia di  sr. Henriquez  a trata di forsa persecucion via e procedura di e asina yama Artikel 12. Lo persigui dos polis si den e caso, cual a keda posponi pa otro siman.

Corte tambe a rechasa un peticion pa persigui tur cinco polis den e caso aki pa e echo cu nan a laga e victima atras den un estado cu e no por a yuda su curpa. E tabata for di su conocemento e ora ey. “No a sali na cla si e cinco polisnan pa malo no a haci suficiente pa yuda e persona aresta’, asina corte ta skirbi den un declaracion.

Cu Mitch Henriquez tabata for di su conocemento, segun Josien van de Poll, hues di prensa di Corte di Den Haag, no kiermen cu e tabata den peliger mortal. “E polisnan no a experencia esaki asina. ” Ta te ora cu por a prueba cu e polisnan si tabata sa, kisas corte lo a persigui.

Gerald Roethof, abogado di e famia di Mitch Henriquez, ta pensa diferente tocante esaki. “Ora a interoga e polisnan nan tabata sospechoso. Loke sospechosonan ta haci generalmente ta pinta e caso mas bunita posibel. Polisnan tin un deber di cuido tambe. E ora ey bo por bisa: nos no tabata sa, pero nos punto di bista ta: nan mester a sa.”

Siguiente pasonan
Awor ta casi imposibel pa persigui e tres polisnan. Si ta posibel segun corte cu ta trata di conducta reprochabel segun derecho disciplinario y por pone estado responsabel pa esaki. Abgado Roethof ta añadi cu e famianan kisas mester bay Corte Europeo pa Derecho Humano.

Richard Korver cu tambe ta yuda e famianan di Henriquez, den un declaracion di prensa ta mustra cu Hulanda dos bes caba a haya reprocha despues cu personanan aresta a muri despues di violencia di polis. E polisnan sospechoso den e caso Henriquez tabatin e oportunidad pa delibera cu otro y esey so caba ta violacion di derecho humano, sr. Korver ta skirbi.

Reaccion di famia
Sr. Korver ta laga sa cu e famia ta ‘hopi desapunta’ despues di e decision di corte pa no persigui e tres polisnan. Segun Roethof e decision aki ta ‘e sla di mas duro for di dia cu Mitch Henriquez a fayece pa e famianan.’

Na juni di 2015 e Arubano Mitch Henriquez a fayece despues di un acto violento di polis. Di e cinco polisnan envolvi den su aresto ta persigui dos.