E costo di renobacion pa Arubahuis ta bay ta asina hopi cu lo no paga su mes bek. P’esey a tuma e decision cu durante aña aki lo muda Arubahuis fisicamente pa un otro edificio. Pa asina aki tambe cuminsa duna inicio na un funcionamento adecuado y conforme exigencianan di aña 2018, y no manera e ta aworaki pega den tempo segun minister Plenipotenciario di Aruba Guillfred Besaril (MEP).
El a elabora riba e restructuracion cu a wordo acorda pa conseho di minister december ultimo. Caminda a wordo acorda cu lo bin un reorganisacion di Arubahuis y el a haya ta na su luga pa duna un splicacion na pueblo di kico tur esaki lo encera.
E motibo principal di e reorganisacion ta cu na momento cu su persona a yega Hulanda, el a realisa hopi lihe cu ta papiando di un organisacion cu ta funciona na un manera demasiado administrativo. E no ta duna espacio pa e tareanan cu en principio Arubahuis mester ehecuta den cuadro cu maneho di Gabinete Wever-Croes poniendo e hendenan central pa motibo cu hopi actividadnan di Arubahuis ta sosode na un forma administrativo tras di un bureau, e no ta e contesta di e diferente preocupacionnan cu tin den practica. “Por ehempel si nos elabora riba e situacion di nos hobennan cu ta bay studia, caminda tin e critica cu bo no ta drenta facilmente den contacto cu e afdeling di enseñansa na Arubahuis”, sr. Besaril ta bisa.
Tarea di Arubahuis
Hopi di nos na Aruba no conoce e tareanan di Arubahuis y no tin un comprendemento riba kico tur ta e tareanan cu ta wordo ehecuta segun e. Pues e ora ey e ta bisa cu lo mester duna extra atencion pa e departamento di conscientisacion di Arubahuis. “Bo ta mira tambe cu na momento cu mi a sinta como minister Plenipotenciario y puntra pa cierto dossiernan, cu lo ta normal den mi area di trabao pa bo sa asina ki cu ken bo ta sinta na mes y con bo ta atende cu e persona politicamente na mesa. Tampoco no tabata tin un figura cu por ta guia bo.”
Cuestionamento riba biahe
Sr. Besaril a wordo cuestiona pa cierto miembronan di prensa riba algun biahe cu e mandatario a haci recientemente. “No ta 26 biahe mi a haci ta paso apenas nos ta bayendo pa di shete siman di gobernacion. Nos no a yega ni 50 dia di gobernacion y mi ta mira comentario cu nos tin mas cu 20 biaha pa madre patria Hulanda colectando Fun Miles. Mi a solamente bay dos biaha Hulanda pa haci mi trabao.” E mandatario ta splica riba su prome biahe den november 2017 caminda cu tabata tin Rijksministerraad pa atende cu ne. Caminda cu tema di nos ruman isla St. Maarten tabata halto den agenda. Y como minister Plenipotenciario e tabata deber di minister Besaril pa ta presente, representando Aruba y vociferando opinion den un caso asina delicado. Anto e di dos biahe tabata memey di december unda cu tabata importante e presencia di e mandatario riba e deadline cu CFT (College Financieel Toezicht) pa duna espacio necesario. Na momento cu tabata na Hulanda pa di dos biaha, entre esaki e tabata tin e honor y privilegio manera nos a publica pa conoce Papa Francisco cu a bendiciona algun bandera di Aruba. Esaki tabata un biahe cu tabata completamente bao guia di COTAL y no a trece ningun gasto particular pa pais Aruba segun sr. Besaril.
Periodo di gracia
“Na momento cu bo wordo huramenta bo tin un periodo di gracia di 30 dia.” Dado momento minister Besaril tabata tin dos opcion: ‘of ta saca minister Plenipotenciario anterior Juan David Yrausquin (AVP) na mal ordo for di e luga of e ta keda den un hotel’. E ta bisa cu ora un mandatario ta biaha e ta haya compensacion y na Aruba e no ta cobra esaki pasobra e ta na su cas. “Mi a scapa Aruba placa pasobra mi ta un gobernante responsabel. Pues aworaki cu nos ta yegando e punto unda cu mi por bay Hulanda na un manera drechi y tin cosnan organisa. Awo cu tur cos ta cla poni mi lo subi avion y cumpli cu mi tareanan na Hulanda. Boso lo mira mi por lo menos dos pa tres biaha pa aña pasobra aki na Aruba mi tin un tarea tambe pa cumpli cu e hobennan cu ta bay dicidi dentro di poco pa nan bay studia.”
E parti di e reorganisacion ta algo cu e gobierno lo bay atende hopi di cerca cu ne. Un di e departamento di Arubahuis ‘hopi interesante’ segun e, ta e parti economico. Pa busca pues oportunidadnan economico pa Aruba y den cuadro cu esey e lo tin cu bolbe regresa y haci un bishita.
