Na e momentonan aki na Hulanda tin e situacion unda cu e parti di racismo pa cu Zwarte Piet a bin dilanti un biaha mas. Aki na Aruba pa mas di 60 aña ta celebra yegada di Sinterklaas y Zwarte Piet, cual ta un tradicion grandi riba e isla y lo mantene esaki, asina e organisacion ta bisa ayera.
Robert Maduro a indica cu dia 20 di november proximo lo tin e yegada di Sinterklaas. “Departamento di Cultura na nomber di gobierno di Aruba y Comision Nacional hunto cu Fundacion Sinterklaas, a prepara p’e evento aki pa di tantisimo aña.” Segun e, si e no ta kiboca esaki lo ta e di 62 aña cu Aruba ta haya bishita di Sinterklaas.
Mantene tradicion
Na e momentonan aki na Hulanda tin diferente discusion ta tumando luga pa motibo cu pa hopi aña Zwarte Piet ta color preto/scur. Internacionalmente e tradicion aki tambe a wordo condena y tambe como algo cu ta bay contra derechonan humano y di mucha.
Sinembargo e organisacion cu sosten di gobierno, ta keda para riba e tradicion aunke cu awor na Hulanda ta cambiando. Cu ta scoge mas y mas pa Schoorsteenpiet.
Bon Dia Aruba a puntra Sr. Maduro un biaha mas riba esaki y si e biaha aki na e yegada lo bay tin algun cambio. “E fundacion tin su opinion. Sinterklaas tin 62 aña ta yegando Aruba, esey kiermen e fundacion lo keda mantene e tradicion. Pero semper, nan lo ta habri pa cambionan,” segun Sr. Maduro. Pero pa awor e ora nada no ta bay cambia. Y no tin claridad e ora ken lo percura cu e tradicion aki lo wordo cambia. Pasobra na Aruba tambe tin ciudadanonan cu no ta celebra e fiesta pa motibo cu nan ta haya e fiesta ofensivo. Sea tin gruponan cu ta haya mester sigui e liña di Hulanda.
Pero tambe tin ciudadanonan cu ta haya cu mester stop di trece e discusion for di Hulanda na Aruba y ta keda para tras Zwarte Pieter. Na Aruba e Zwarte Piet no a cambia mucho tampoco compara cu Hulanda unda nan no ta haya corecto mas pa menasa mucha cu ‘roe’ y ‘zak pa bay Spaña’. Na Aruba a tradicion aki si a keda y ainda por mira basta mucha yora durante yegada di Sinterklaar na nos isla.
Evento riba Plaza Betico Croes
E aña aki e evento lo tuma luga riba Plaza Betico Croes. “Biniendo cla cu ultimo detaye nan y cu nos tabata tin contacto cu DOW, nos a haya e luz berde cu e actividad di Yegada di Sinterklaas despues di parada lo tuma luga riba Plaza Betico Croes,” segun Sr. Maduro. E plasa ta den renobacion.
Ruta di parada di Sinterklaas
Sinterklaas ta yega 10or di mainta waf na Playa. Porta lo ta habri di 9:30 caba, unda cu paden lo ta bay tin un ceremonia chikito di e Pietnan cu a yega un poco mas prome. Na yegada di e barco di Sinterklaas, e lo subi den su auto estilo bieu cu su Pietnan rond di dje, direccion Plaza Betico Croes.
Tin un trailer cu musica di Sinterklaas cu tambe ta den e parada cu ta bay di LG Smith Boulevard bin ariba y e muchanan ta haya e oportunidad pa saca potret cu Sinterklaas y su Piet. Lo tin diferente tent di cuminda y snacks pa tur publico presente.
