termento (1).JPG
Termento ainda ta keda un problema grandi bou muchanan y hobennan. Pero Telefon pa Hubentud a bin cu un proyecto cu den su fase piloto a duna un bon resultado na 8 scol participante. Proximo aña escolar e intencion ta pa lansa esaki na 31 scol den forma di ‘Pest Protocol’. 
 
Desde 1999 ora cu Telefon pa Hubentud a wordo funda, nan por a ripara den e cifranan cu e problematica di termento tabata uno grandi na Aruba bao di nos muchanan y hobennan. Esaki segun Telefon Pa Hubentud, ta algo cu tur aña ta keda bini pa dilanti, sin embargo a experiencia un reduccion di 21% segun estadistica desde introduccion di un proyecto nobo.
 
 
Segun director di Telefon pa Hubentud, James Sneek, e persona cu ta wordo considera como e guru en cuanto ta e tema di termento ta Dr. Dan Olweus di Noruega pa motibo cu henter un proyecto a wordo desaroya basa riba resultadonan di varios estudionan cu el a haci. 
Na 2012, Telefon pa Hubentud a acerca doño di e proyecto aki den exterior, paga e licencia pa por uz’e anto bin cu esaki Aruba pa adapta esaki na e cultura Arubiano. “Nos a haci e crioyo pa e por pas na Aruba anto tin un resultado efectivo. E ora nos a bin cu e proyecto ‘Prevencion di Termento na Scol’ cual a wordo lansa na aña 2013’, sr. Sneek ta bisa.
 
Evaluacion 
Cu e proyecto aki, Telefon pa Hubentud a ripara cu e tema di termento ta keda bini den e top cinco den tur nan rapportnan. Esaki ta un proyecto cu ta costa hopi placa pasobra e tin hopi material pues Telefon pa Hubentud a dicidi di traha cu CBS(Oficina di Estadistica)  pa evalua e proyecto pa wak si e tin un impacto positivo anto si e ta efectivo of no aki na Aruba. 
CBS a bay ocho scol den total den ocho districtonan di Aruba anto nan a midi kico ta e comportacion di termento na e scol. Nan a determina cu 56.6% di mucha ta sufri di termento cual ta mita di e scol. Despues e proyecto a wordo introduci anto el a keda den e scolnan entre shete pa nuebe siman. CBS a bolbe calcula kico ta e impacto di termento na e momento ey anto segun sr. Sneek: “Loke nos por a wak ta un reduccion di 21% cu ta bisa bo dos cos: e ta bisa bo cu e proyecto ta efectivo, pero tog e ta bisa bo cu ainda tin mas pa haci. Den comparacion cu paisnan manera Hulanda of Merca, bo ta ripara cu toch nos ta basta halto.” 
Banda di esaki, Telefon pa Hubentud a pone e proyecto pasa bao di un evaluacion di loke ta un metodo Hulandes. Na 2013 staatssecretaris di Enseñansa di Hulanda a ripara cu na nan pais. tabata tin 103 contra termento. “El a haya cu esaki tabata un ‘wild wild west’ y a bisa pa bin cu indicadornan di kico un proyecto di termento mester cumpli cu ne pa determina si e te efectivo of no. Nos tambe a pasa nos proyecto den esaki pa wak si e ta efectivo anto a constata cu e ta cumpli cu tur rekisito’, sr. Sneek ta bisa. 
31 scol casi cla cu ‘Pest Protocol’
Tur esnan cu a duna e proyecto na e scolnan a notifica kico nan a haya bon y malo di e proyecto anto a base di nan contesta, Telefon pa Hubentud a haci adaptacion na e materialnan. E proyecto aki pues a pasa den tres evaluacion anto basa riba tur esaki Telefon pa Hubentud ta bay percura pa cuminsa train personalnan di scol. A cuminsa caba cu esaki riba 12 di september y termina 25 di november unda cu 31 scol a haya training. 
Den total tabata 93 docente na Aruba cual ta nifica cu aworaki den 31 scol na Aruba, tin un personal den scol cu sa kico e tema di termento ta encera, e efectonan como tambe e instrumentonan pa trata e comportacion aki. “E ‘Pest Protocol’ aki lo ta e fundeshi cu ta bay carga e proyecto pa asina den largo plaso percura pa no tin comportacion di termento na bo scol. E scolnan aki ta ricibiendo actualmente material pa docente, alumno como tambe material pa e mayornan na cas completamente gratis.” 15 di e 31 scolnan a haya e material aki caba y aworaki ta percurando pa e resto ricibi esaki. 
E tema di termento ta un tema cu ta bibando actualmente anto Telefon pa Hubentud a haya hopi yamada den 2016 tambe ainda riba dje. E intencion ta pa lansa e ‘Pest Protocol’ den tur 31 scolnan den e proximo aña escolar cual segun Telefon pa Hubentud: “E ta bay ta un luz hopi grandi riba e tema, e proyecto anto e acercamento pa e problema di termento.”