Bou di condicionnan estricto lo cuminsa importa fruta y berdura di Venezuela otro siman diahuebs 7 di juni venidero.
Ayera a tuma luga e reunion entre e delegacion di Estado Falcon y un delegacion di Aruba na Punto Fijo tocante reapertura di e frontera maritimo cu Estado Falcon y kico ta e condicionnan cu mester mantene nan mes na dje. Esaki ta segun e comunicado cu nos a ricibi minister president Evelyn Wever-Croes.
A base di esey minister president Evelyn Wever-Croes a dicidi di habri e frontera maritimo cu Venezuela entrante otro siman diahuebs 7 di juni venidero pa fruta, berdura y pisca segun e procesonan y documentonan palabra entre Aruba y Estado Falcon. Ademas ta inclui e yatenan di placer cu ta cumpli cu e rekisitonan estableci.
Lo tin controlnan estricto na nos frontera pa evita ilegalidad y contrabanda. Solamente botonan cu un certificado oficial pa transporte, por transporta fruta, berdura y pisca.
Cu esaki gobierno a cumpli cu e compromiso di haci tur lo posibel, a pesar di e circunstancianan dificil, pa habri frontera pa asina importa fruta, berdura y pisca for di Venezuela.
Cera Frontera
E problema a cuminsa dia 5 di januari, momento cu autoridad Venezolano a acusa paisnan Corsou y specialmente Aruba di ta participa na contrabanda di material strategico for di Venezuela.
Na luna di mei delegacionnan di Aruba, Boneiro y Corsou a reuni cu delegacion di Venezuela. E reunion ta un asina yama ‘follow up’ di e acuerdo firma dia 12 di april, Di cual gobierno di Aruba a dicidi cu lo cera frontera maritime te cu dia 6 juni. E delegacion di Aruba a enfatisa su posicion, cu tanten cu no tin claridad y transparencia riba procedura, documentacion y e autoridadnan competente, no por papia di ‘business as usual’. E delegacionnan a haci e palabracion cu den e siguiente dianan lo intercambia documentonan y e lista di productonan cu Venezuela ta designa pa consumo nacional of riba cual tin restriccion pa exportacion.
