Lo habri diferente shelter awe. Habitantenan di Malmok por spera evacuacion

 Aruba tin 25 luga unda hende por haya shelter. Awe lo habri un par di nan y awe mainta e instancianan concerni lo dicidi cua nan ta.

Te awor e situacion no ta asina grave, asina prome minister hunto cu hefe di brandweer y di polis a bisa ayera nochi den un conferencia di prensa urgente pa asina informa di e ultimo riba e mal tempo . Nos no mester ta hopi preocupa pero si suficiente perpara pa tuma precaucionnan necesario, ta e mensahe di prome minister Mike Eman.

Awe mainta 30 cabes di diferente instancia, organisacion y departamento ta sinta hunto pa sigui cu e preparacionnan. Prome cu esey, mas trempan, ya un team mas chikito a bin hunto caba riba e situacion.

Informacion extra cu Bon Dia Aruba a logra di haya fuera di e conferencia di prensa aki ta, cu mañan lo habri cierto shelter. Momento cu e edicion aki a cera, ta papiando di e stadion Frans Figaroa specifico pa motibo cu den e area na Noord y Malmok por spera mas problema. E area aki ta mas abou y den pasado experiencia cu awacero a haci cu awo ta tuma mas precaucion. Den caso cu e efectonan ta hopi malo, habitantenan di Malmok mester tene cuenta cu gobierno lo evacua nan. Y e ora nan lo bay Frans Figaroa.

Otro shelter nan activo ta Compleho Betico Croes (Sporthal) y YMCA pa e habitantenan pariba di brug.

Mas preocupacion pa awa
Te awor Bon Dia Aruba por scucha for di autoridadnan cu nan no ta mucho preocupa awor cu e biento pasobra te awor e prognostico ta cu Matthew lo keda un tormento tropical ora e ta pasa cerca nos isla. Sinembargo tin mas preocupacion pa e cantidad di awa cu lo cay. Manera bisa den pasado esaki a causa e problemanan mas grandi. DOW a limpia e rioolnan den e dianan ki y tambe ta prepara cu pomp y otro material pa yuda den casonan di inundacion.

Ambulance
Prome minister tambe a informa cu lo dividi e ambulancenan riba e isla: 2 ta keda na Wayaca Falls y 2 na Imsan, e postnan normal di ambulance. Lo pone 2 tambe na warda di polis na Macuarima y 2 ambulance na brandweer Tanki Flip.

Contacto cu otro islanan
Aruba tambe ta den contacto cu e otro islanan. Segun prome minister el a caba di papia cu e gezaghebber di Boneiro y nan a indica cu te ainda no tin mucho efecto di e tempo. Bon Dia Aruba a tende cu te awor Corsou no a cancela e eleccion cu lo tuma luga diabierna.

Den caso ta necesario lo cera luganan. E suerte ta cu diabierna ya ta un dia (ATV) liber pa maestronan como cu e scolnan lo ta cera. Comisario di polis Dolfi Richardson ta bisa cu te awor nan no ta mira niun problema pe manifestacion contra criminalidad cu lo cuminsa awe tardi 4or. (Update: awe mainta e manifestacion a keda cancela)

Polis y tur otro personal di otro departamentonan encarga cu situacionnan di calamidad ta riba e shift di 12 ora pa e siguiente 3 pa 4 dia. Brandweer a wordo apunta como e punto central tambe pa informa. Segun hefe Edward De Cuba brandweer ta cla cu su preparacionnan. Riba pregunta di Bon Dia Aruba si falta material pa nan por haci nan trabou, e ta contesta cu tur cos cu mester, nan tin.

Finalmente di parti di hostipal nos por compronde cu nan tambe ta cla cu nan preparacionnan.

Den caso tin mas update, por sigui nan riba nos website www. bondia24.com