E prome siman di luna di mei venidero, Aruba lo ta anfitrion di un magno evento cu lo conta cu presencia di  miembronan di cuerpo di polis y agencianan di siguridad internacional, considerando e tema cu ta uno masha actual y interesante.  

Un parti di e conferencia aki ta cu nan lo firma un protocol cu e cuerponan policial di Caribe. E ta un protocol di cooperacion riba combatimento di organisacionnan di crimen nacional y internacional. Un di e base cu e conferencia aki lo tuma luga na Aruba ta esun di uni forsa entre e diferente cuerpo di polis di Caribe y organisacion internacional presente.

E actividad aki lo sosode for di dia 1 pa 5 di mei proximo. E ta trata di un conferencia di e asociacion di tur e hefe di polis di nos region Caribe cu ta cay bou organisacion ACCP (Association Of Caribbean Commissioners Of Police).  E tema cu a wordo scogi ta “Globalisacion y Crimen Organisa Transnacional”. E lo tuma luga na Aruba Hilton Resort.

Polis uni pa paz
E agenda di e conferencia ta uno amplio. Lo tin alrededor di 18 tayer duna pa expertonan internacional.  E prome dia nan lo organisa un marcha di husticia riba 1 di mei den oranan di mainta dilanti e area hotelero cu e participacion di e sector aki, y organisacionnan cu ta traha estrechamento cu cuerpo policial riba e tereno di siguridad. E parada aki lo conta cu cooperacion estrecho di fundacion Sonrisa cu hunto cu cuerpo policial y diferente partner y sponsor manera ATA y AHATA, nan kier duna e mensahe na mundo cu tur polis di Caribe ta uni pa paz. P’esey nan lo uza e simbolo blanco durante nan cinco dia di actividadnan.

Comisario di Polis Trudy Hassell a bisa cu hefe di polis Dolfi Richardson a dun’e encargo pa organisa e conferencia aki. Durante e cinco dia di tempo di e conferencia, nan ta bay purba pa no solamente duna informacion na tur e polisnan Caribense riba diferente topico. Nan ta topiconan cu tin di haber cu crimen organisa, uzo di social media pa investigacion penal y tambe con pa protege e ciudadanonan di Caribe mediante cooperacion entre tur cuerpo di polis di e region aki. “Asina nos lo garantisa cu nos ta keda tambe un step mas dilanti cu organisacionnan grandi transnacional”, sra. Hassell a informa.

Organisacionnan y VIP internacional
El a bisa cu e tayernan lo wordo duna pa expertonan internacional entre nan e hefe di polis di Ottawa  (Canada) y mas invitadonan VIP (hefenan policial internacional) y expertonan di organisacion internacional manera FBI, Interpol, DEA, etc.. Tambe lo tin experto local manera sra. Jannet Richardson kende lo bay papia tocante traficacion di hende y tambe sr. Yuri Nicolaas kende lo papia rond di e tema central di Globalisacion y Crimen Organisa Transnacional.

Comisario di Polis Hassell a indica cu e conferencia aki ta di un magnitud di peso internacional, unda Aruba como sede lo contribui den e actualisacion di nos polisnan.  E parti di e firma di e protocol pa estrecha e lasonan di cooperacion entre cuerpo di polis di Caribe pa combati organisacionnan criminal nacional y internacional ta un paso importante den e direccion di cooperacion. “Pasobra nos ta kere cu e unico manera pa bo por combati crimen ta si bo ta uni forsa.”

E ta invita tur departamento di gobierno y instancianan di afo  cu tin di haber cu cuerpo policial riba lucha contra crimen organisa pa tuma contacto cu KPA na Centro di Husticia (Santa Cruz)y asina inscribi na e diferente tayer cu tin.  Ya cu tambe ta bay tin un expo  di companianan internacional cu lo exhibi nan productonan specialisa. Nan lo duna informacion riba tur e desaroyonan internacional cu tin actualmente riba tereno di digitalisacion y informacion. Tambe riba tereno di social media y con nan por uza tur informacion  aki como evidencianan den caso di investigacionnan penal. El a formula un invitacion pa tur hende y compania interesa pa participa pa tuma contacto cu KPA su sede na Macuarima (Palacio di Husticia). Esunnan interesa mester inscribi lo mas pronto posibel, ya cu e interes internacional den e conferencia aki ta grandi pa bin Aruba.  E ta spera cu companianan local lo sa di  saca cara di nos isla pa cu e magno evento aki.