Minister Dangui Oduber:
Ayera tardi a drenta un informacion di gobierno, cu lo tin un holo fuerte di diesel den e camber di generator na hospital. Esaki no ta pa prome biaha. Bon Dia Aruba a tuma contacto cu instancianan concerni y tambe cu e minister encarga.
Segun e prome informacion cu nos a ricibi ‘tur esfuerso ta wordo haci pa contene e problema y ta evita cu mester kita coriente’. Esfuersonan di Bon Dia Aruba pa haya informa cerca instancianan concerni tocante e problema no a duna resultado te na momento di ceramento di e matutino.
Reaccion minister
E minister encarga cu salubridad publico Dangui Oduber (MEP) den un reaccion pa Bon Dia Aruba a splica cu full e sistema actual mester wordo cambia. “Lo mester bay hacie sea un closed loop of open loop system”, e minister ta comenta.
E ta sigui splica cu loke tin actual, no tin un sistema di siguridad riba dje, treciendo na peliger salud y bida di esnan cu ta na hospital. “Esaki no ta un tema pa haci chansa cu ne y mi ta tume den tur seriedad. E sistema simplemente no ta apto pa un hospital. Y lagami bisa e cos aki duidelijk, SOGA lo wordo exigi pa atende cu e asunto aki cu man duro. E ta un responsabilidad pa cu bida di hende y actualmente e sistema aki ta un riesgo hopi grandi”, e minister ta bisa Bon Dia den un tono serio.
E caso
Aña pasa na luna di november tambe tabata tin problema unda a descubri un derame di diesel den e edificio.
E leak tabata riba un piso di e parti nobo di e edificio unda cu e generadonan ta. Mester a haci un evacuacion grandi na hospital pa motibo di e gas flamabel – mas cu 10.000 liter a lek – cu a cuminsa afecta salud di hende e momento ey.Tabata tin diferente departamentonan di hospital hopi crucial cu a keda afecta un rato y camber di operacion cu a wordo poni fuera di funcion momentaneamente.
