E plan nacional pa atende cu cachonan di caya porfin ta bira realidad. Lo elimina Kill Cage y crea Dog Act Shelter.
Despues cu a introduci e ley di cacho5 aña pasa, awor tin un maneho concreto pa atende cu cachonan di caya. Cu e maneho aki ta bin tambe campañanan di sterilisacion, pero principalmente di conscientisacion pa doñonan di cacho sa nan responsabilidad.
Prome cu dicidi pa tuma un cacho, un puppy, of cualkier animal domestico, mester realisa cu tin hopi responsabilidad cune: Cuminda adecuado, cuido veterinario, gasto pa no contribui cu mas cacho riba caya (sterilisa of capa) etc. Pero tambe por dicidi cu keda sin tuma un cacho tambe por ta un escogencia responsabel, si di antemano bo sa cu bo no tin tempo p’e, ni e manera di provee un cuido adecuado p’e.
Forma di mata bestia na Kill Cage
E forma con ta mata bestia na e Kill Cage ta totalmente inaceptabel. Y berdad por tin varios persona kendenan lo bisa cu tin hopi otro tema cu mester haya prioridad den nos pais aworaki. Esaki ta berdad, pero nos no por sigui tolera e forma cruel cu e Kill Cage ta opera.
Prome Minister a cita e dicho di e gran Mahatma Ghandi kende a yega di bisa: “E grandesa di un nacion por wordo husga na e forma cu e animalnan den e nacion ta wordo trata”.
Prome Minister a gradici Irene Croes y Dellanire Maduro kendenan a traha duro pa asina e plan nacional keda cla. Tambe a gradici Ministernan Dangui Oduber, Andin Bikker y Otmar Oduber pa e cooperacion den esaki.
