29jan, JM, HAVA (1).jpg

Proximamente lo bay tuma luga un campaña caminda cu AZV, cu cooperacion di tanto Departamento di Salud, como Asociacion di Dokternan di Cas, HAVA, lo bay haci un investigacion riba e practica di dokternan di cas, tanto fisico como e cuido di e pashent.

Joaquin van Trigt, presidente di e Asociacion HAVA, a splica cu asociacion kier coopera cu e investigacion cu AZV y DESPA kier haci y mustra cu e dokternan ta transparente pa loke ta e calidad di cuido cu e dokternan di cas ta brinda nan pashent. Como asociacion nan kier mustra cu ta tuma e calidad di cuido na curason y pa e pashent haya e calidad di cuido cu e merece y cu e dokternan mes ta desea pa nan mes.

Un trato bao di nivel?

E Asociacion tambe sa cu tabata tin cierto indicadornan for di media, for di sindicatonan cu e calidad lo por ta bao di un nivel cu no ta desea y esaki ta un manera cu ta habri portanan di e oficinanan di dokter pa AZV haci nan trabao y wak kico por wordo drecha. E dokternan lo coopera completamente y si tin cosnan cu mester wordo mehora, e dokternan tambe lo haci nan best pa drecha esaki. Semper ta pensa, como un dunado di cuido cu tin cosnan cu mester mehora. Tin hopi cos cu ta bayendo bon, pero tur hende mester ta dispuesto. Si bisa cu haci tur cos bon, dado momento no ta bay dilanti. P’esey kier coopera cu e investigacion aki y mustra cu ta tuma e calidad tambe na serio.

 

42 dokter, 42 diferente manera

Van Trigt a splica tin un total di 42 dokter di cas na Aruba y ta spera cu tur hende ta planifica su consultorio riba su mesun manera. Tur hende tin un otro standard di calidad. Esey ta un opinion personal, pero mester percura pa cumpli cu cierto nivel di calidad cu ta wordo acepta no solamente na Aruba, pero internacionalmente. Dokternan mes mester dicidi kico nan kier, ki calidad nan kier brinda na nan pashentnan. Calidad no tin un manera pa midi esey. Bo mes ta dicidi ki calidad bo kier brinda na bo pashentnan, segun van Trigt.

 

Habri pa critica

AZV a discuti riba cierto cosnan cu ta minimal cu un practica mester por tin, cu mester por brinda na su pashent, cu ora ta bao di e nivel, e no ta aceptabel y p’esey tur mester wak cu nan lo mester por alcansa un cierto nivel. Mester pone bo mes habri pa critica constructivo cu tin cosnan cu por mehora. Sigur mester por papia riba dje y no haya un invasion di privacidad. Esaki ta un manera pa  traha riba cosnan pa mehora, segun Van Trigt.

 

Mas druk, menos tempo

Mayoria di consultorio tin un cantidad di pashent fiho cu a haci un afspraak cu AZV riba dje y tin algun otro consultorio cu tin hopi mas cu e averahe y ta consultorionan hopi grandi y ta trahando pa wak con por baha e cantidad di pashentnan tambe pa e dokter por tin mas espacio. Mas druk, mas pashent tin, lo por bisa cu mas druk lo bo tin’e y menos tempo bo tin pa hinca den e pashent. Mester purba di generalisa e consultorionan na un nivel cu tur hende por traha mesun duro y mesun comodo, sin presion, segun van Trigt. Mester percura pa tin unidad entre e miembronan di HAVA y no ta  tur hende no tin e mesun opinion.