Den un conferencia di prensa, prome minister Evelyn Wever-Croes a sigura cu Aruba a forma un parti hopi importante di Segundo Guera Mundial y tin balor historico, y awo ta bay duna un realce na e parti aki cu lo bira un producto turistico.

Esaki ta algo cu comunidad ta bin scuchando frecuentemente y Aruba tin historiadonan cu ta papia di esaki tambe, como por ehemplo Dufi Kock, cu ta traha mas riba e conscientisacion den e area aki.

Durante e di Dos Guera Mundial Aruba su refinerianan tabata esnan cu tabata abastece e avion di e aliadonan y na cierto momento e Alemannan a logra isola e forsa di aliadonan di por haya abastecemento di e fuel cu nan tabatin mester y tabata na Aruba y Corsou so cu nan tabata hay’e.

Den esaki, na cierto momento e Alemannan a lansa un atake masivo riba Aruba cu submarinonan pa destrui e refineria y den e proceso aki a rementa varios barco, unda casi 47 persona a fayece di cual mayoria tabata Mericano, pero entre nan tambe tabatin 16 persona di Boneiro.

Debi na esey, Gobierno di Aruba a dicidi di construi un memorial na e punto di e sero na Sero Colorado cu tin dos proposito, manera prome minister a señala.

E prome ta pa tur hende por recorda e pasado di Aruba y siña di dje, pa asina evita cu cosnan cu a pasa den pasado lo bolbe ripiti. Y e di dos ta pa recorda na e bishitantenan cu ta bin Aruba e papel importante cu e isla aki a hunga e tempo aya.

“Nos ta kere cu esaki lo bira un atraccion turistico hopi grandi,” prome minister a sigura.

Algo cu pandemia di Covid-19 a siña ta cu Aruba mester cambia e producto turistico y tin cu cambia kico por ofrece na e bishitantenan. A mira cu mas hende ta interesa di bishita atraccionnan cu ta pafo (‘outdoor’) y asina na bin cu e comision Aruba’s Outdoor Amenity, cu a traha caba riba Ayo y Casibari. Aworaki ta trahando riba e proyecto aki di Sero Colorado unda actualmente e lighthouse ta.

Rond di e area por ripara cu tabatin cuatro bateria cu tabatin cayon y rond di nan tabatin bunkernan tambe, caminda tur cos tabata tuma luga pa protege Aruba su refineria. “Un balor historico enormemente grandi cu no ta bon conserva, nos kier bay cambia esaki cu un impacto minimo riba naturalesa, manteniendo su balor y tambe den e parti financiero mirando cu nos no tin e fondonan grandi,” prome minister a declara.

Ta bay haci un proyecto na e sitio, unda e cuatro bateria ta bay bira un low pad cu hendenan por cana y mira. Lo duna realce na e baterianan aki y memey lo tin un monumento cu e nomber di esnan cu a fayece.

Setar ta bay pone via telefon un QR Code pa e ora hende por download un timeline di kico a pasa momento pa momento tempo cu e submarino tabata yegando cerca y te na momento cu el a bombardia e barconan.

Ademas, prome minister a sigura cu ya caba tin contacto cu tur compania di tour y segun el a bisa, tur di nan ta hopi entusiasma pa ofrece esaki adicional na e turistanan. Unabes cu e turistanan mira esey, e companianan di tour lo hiba nan na centro di San Nicolas, e ora ey lo coordina e actividadnan unda turistanan por experiencia realmente kico ta e toke di Aruba Caribense cu ta ofrece den San Nicolas.

Banda di e parkinglot di Arubus ta bay bin un di dos mural pa ora turistanan baha por bolbe mira e timeline. E murayanan ta bay baha pa asina tin bista riba e tereno di e refineria y pa lama, eynan nan por weita tambe unda e refineria tabata ta.

Aunke tin hopi infrastructura cu a bay perdi y material frustia, esey tin un balor historico y ta prueba cu ora un bishitante ta haya e historia, e lo kier mira tambe mas di cerca unda esaki a tuma luga.

E proyecto aki a keda aproba y e fondonan tambe unda ta un proyecto conhunto di prome minister su ministerio di Asuntonan General, Ministerio di Turismo y Ministerio di Energia, cu segun nan plannan e mester keda cla otro aña na luna di mei ora ta conmemora e segundo guera mundial. Tourism Product Enhancement Fund (TPEF) tambe a pone fondonan na e proyecto aki.

Te cu aworaki e proyecto aki tin un costo di 265 mil florin aproba door di TPEF y 80.000 mas cu ta pa desaroya e low pad, bunker, baterianan y lo cual no ta inclui ainda ta e señalnan y kico e memorial mes ta bay bira

“Nos ta convenci cu esaki lo trece e fluho di trafico di hende manera nos kier den San Nicolas pa asina tambe trece e desaroyo y progreso cu nos ta busca,” prome minister a finalisa.