Diabierna un hues Mericano a dicidi cu e huicio di Joaquín “el Chapo” Guzmán, un di e caponan mas grandi di historia di narcotrafico lo cuminsa dia 16 di  april di proximo aña.

“E fecha di huicio lo ta 16 di april. Nos lo purba di cumpli cu e dia aki”, hues Brian Cogan a bisa den un audiencia na Corte Federal di Brooklyn, caminda Chapo Guzman tabata presente .

Guzman, di 60 aña, tabata bisti un trahe blauw y el a scucha hopi serio tur palabra di hues Cogan. “El Chapo” a responde hopi biaha “si, señor” riba tur pregunta di hues Cogan. Guzman tabata apoya pa un traductor y tambe el a comunica su decision y deseo di continua cu su abogadonan Michelle Gelernt y Michael Schneider, pa traha den su defensa y representacion.

Den corte tabata presente su casa Emma Coronel, di 27 aña y mama di su dos yiunan. Coronel tabata bisti completamente na blanco. Guzman y Coronel a crusa algun par di mirada durante e audiencia.

Diahuebs  hues a prohibi “Chapo Guzman” pa haya bishita den prizon, pero el a autorisa si pa un intercambio di mensahe bao supervision di algun autoridad. Nan a garantisa cu abogado di gobierno di Merca no lo tin acceso na mensahe cu Chapo Guzman por manda pa su famia y abogado cu ta traha den su defensa.

Abogadonan ta pensa cu e huicio por dura entre dos y tres luna.  Abogado Gelernt a solicita na hues un contacto directo cu Chapo Guzman pa asina por traha riba su defensa den e fase preparatorio di e caso aki, pasobra te na e momento aki nan ta papia via un muraya di plastic transparente.

Gelernt  a bisa cu mester mustra Chapo Guzman mas di 100 documento” riba un mesa y no  via e plastic cu ta funciona como muraya, pasobra asina e caso ta tarda hopi. Gelernt  a comunica tambe otro dificultad cu ta e trabao di traduccion di Ingles pa Spaño y vice versa, situacion cu ta complica e desaroyo y avance di defensa di Guzman.

Hues  Cogan no a tuma un decision ainda tocante e solicitudnan aki, pero no a mustra positivo pa e peticion aki. El a bisa cu lo scoge otro hues pa bay na prizon di Manhattan y asina studia e situacion y prepara un informe. “E ta hopi complica, mi ta kere cu no ta posibel pa prepara un caso di e manera aki” , hues Cogan a admiti.

Chapo Guzman ta acusa di dirigi un imperio di narcotrafico riba ruta pa Merca.  Guzman no a declara su mes culpabel di 17 acusacion cu tin riba su persona di banda di husticia Mericano. E prome acusacion riba Guzman ta e direccion di cartel di Sinaloa, y e acusacion aki por nifica un condena di cadena perpetuo.

E proximo audiencia cu Guzman lo tin prome cu dia di huicio, ta planifica pa dia 15 di augustus  di 2017.