Lo busca mas opinion medico pa Lunah despues di conseho negativo di Hulanda y Colombia

Baby Lunah pa algun tempo caba ta na Utah, na Merca, unda ta buscando un forma pa haci intervencion medico pa yuda e criatura cu a nace dia 3 di december 2015 cu “Trisomia 18”. Na Aruba e dokternan a duna un diagnostico, pero asina mes a opta pa manda e baby Colombia pa un operacion, riba cual el a reacciona positivo.

Su mayornan ta sigui den e lucha pa por brinda nan baby un bon calidad di bida, no obstante e realidad di su situacion. Den esey nan a haya un Hospital na Utah cu ta dispuesto pa core e risico di e operacion di curason cu kier efectua awor riba e baby. Pero, tur cos ta mustra cu, mirando su condicion delicado, cu lo mester efectua un serie di  operacion, pa drecha su calidad di bida.

Den esey AZV a opta pa busca un otro opinion medico for di expertonan riba e materia di Hulanda y di Colombia. Ambos a manda un conseho negativo, bisando cu e risico di e operacion ta mas cu e resultado spera. E mayornan no a keda contento cu e decision di AZV, basa riba e conseho di expertonan.

Diabierna mainta a tuma luga un reunion entre Minister Dr. Alex Schwengle, AZV y mayornan di Baby Lunah cu ta na Merca actualmente y nan representante huridico cu ta na Aruba. A acorda cu lo busca mas opinion medico riba e caso specifico aki di Baby Lunah mirando cu tanto Hulanda como Merca a duna nan conseho sin mira e pashent mes y sin evalu’e. Nan a tene cuenta solamente cu e testnan haci den pasado y e historia di e tipo di casonan similar. Pero Baby Lunah por ta un excepcion, pa cual ta prefera pa laga un centro hospitalario specialisa den pashentnan cu alteracion genetico evalua baby Lunah y duna nan conseho un biaha mas riba e caso aki , riba cual AZV lo por basa su decision.

Tanto Gobierno como AZV ta considera cu e reunion a bay den masha bon ambiente y cu na final tur partido tin e mesun meta, mehora calidad di bida di Baby Lunah.