Ayera empleadonan y pashentnan di Hospital Horacio Oduber a pasa den un susto grandi ora cu a descubri un derame di diesel den e edificio. E leak tabata riba un piso di e parti nodo di e edificio unda cu e generadonan ta. Mester a haci un evacuacion grandi na hospital pa motibo di e gas flamabel – mas cu 10.000 liter a lek – cu a cuminsa afecta salud di hende tambe.

Ayera director di hospital Ezzard Cillie a duna informacion na dos rueda di prensa durante e dia relaciona cu e incidente di emergencia aki. “Nos a wordo confronta cu un situacion cu nos mester a actua hopi lihe.” E diesel a keda plama den un manera cu el a afecta henter e hospital cu un holo fuerte, saliendo for di e generator room. Ora cu mas hende a cuminsa ripara e holo aki a bin resalta cu algo no tabata bon.

Director di hospital Cillie ta enfatisa cu hospital no por pasa den algo asina ki.  “Nos tabata tin hopi suerte cu nos ta bon ekipa. Y nos tin e grupo di 80 boluntario cu ta traha pa hospital, y den nan tempo liber a bin yuda nos. Si nos no tabata tin e hendenan ey, nos riesgo lo tabata mucho mas grandi,” el a declara na prensa. ImSan tambe a acudi pa yudansa pa por a trata cu e situacion tambe.

E luga a keda haci limpi y instancianan concerni a haci nan midinan despues cu mester a kita coriente pa algun momento pa evita desgracia. Mester a cancela bishitanan di merdia y no laga publico drenta hospital pa algun rato mientras cu tabata haciendo limpi na e area. Pues a limita bishitantenan den e edificio pa no complica e situacion mas. Despues di algun ora e director a declara cu nan ta na caminda pa normalisa bek na hospital. Sin embargo el a declara cu:  “Ainda nos no por saca afo e causa di locual a tuma luga. Aworaki e investigacion ta bay tuma luga. Un grupo externo lo bin di afo pa haci un investigacion riguroso pa bay wak kico precisamente a pasa of cu a causa locual a sosode.”

E director a calcula cu pa ayera nochi tur cos lo mester por cuminsa draai normal atrobe na hospital despues di e susto grandi aki. Tin hopi cos cu a keda detecta caba segun e director pero ainda no conclui con e diesel por a lek.

Pashentnan evacua
Tabata tin diferente departamentonan di hospital hopi crucial cu a keda afecta un rato y camber di operacion cu a wordo poni fuera di funcion momentaneamente. E pashentnan a keda transporta na otro areanan unda tin menos ekipo por unda nan tabata mas safe segun e director. Den parti di atardi ora cu a constata cu cos a cuminsa normalisa, a cuminsa traslada e pashentnan aki debidamente na nan camber. Ainda tin area cu a keda afecta cu e holo unda cu empleadonan mester a cuminsa cana cu mask pa motibo cu a bira iritante pa traha cu e holo. E peliger of riesgo mas grandi – locual compania di utilidad Elmar a percura pa bisa hospital tambe – tabata e damp cu tabata sali for di e likido. Esaki por a causa un explosion basta grandi cu tur e resultadonan fatal den dje segun e director. Departamentonan DTI, DOW y hendenan di Calamiteid Comissie tambe tabata presente pa sigura cu locual nan ta haci tabata safe.