Hopi biaha por scucha comentarionan cu tin mas ley na Aruba cu tin control. Casi tur e control ta wordo pusha riba Cuerpo Policial di cual nan capacidad di hende ta conoci no ta suficiente grandi pa cubri tur e leynan aki. Den cuadro cu mehoracion den combati y preveni criminalidad, segun minister di Husticia Andin Bikker (POR) a declara ayera, nan ta bay haci como gobierno mas uzo di agentenan extraordinario pa remedia esaki.
Ministerio di Husticia a haci un analisis conhuntamente cu Ministerio Publico anto a bin ripara cu tin diferente leynan pa cual automaticamente ta apunta Cuerpo Policial pa control di e leynan aki. Pero hopi biaha mester constata y nos matutino a yega di publica varios biaha riba esaki tambe cu Cuerpo Policial tin hopi tareanan pa atende cu ney no por reenforsa tur ley.
Por ehempel e ley pa derechonan cu tin pa salvaguardia animalnan domestico, leynan di control di medio ambiente y hopi otro diferente leynan cu ta cay bao ordenansanan special, banda e codigo penal. Bo ta haya e ora cu no por spera cu Cuerpo Policial so ta wordo exigi pa reenforsa tur e leynan aki cu un capacidad limita segun e mandatario di Husticia. “Y nos a bisa tambe cu nos como gobierno kier bay concentra hunto cu Cuerpo Policial mas bien riba e crimennan di impacto hopi grandi manera atraconan y crimennan cu ta trece un peso grandi pa comunidad”, el a bisa. Gobierno a dicidi e ora pa comparti e autoridad unda e ora lo bay den e direccion eynan mescos madre patria Hulanda.
‘Agentenan extraordinario’
Pa loke ta trata e cantidad di persona disponibel riba payroll di gobierno, ta den deliberacion cu Departamento di Recurso Humano pa haya un miho bista riba esaki segun minister Bikker.
E mandatario ta enfatisa cu pa loke ta trata cupo di personal, necesariamente no lo tin mas peso pa presupuesto di pais Aruba. “Na final di dia nos lo aloca fondo si pa trece un balans pa nos restaura siguridad bek na pais Aruba. ” E hecho ta cu tur partido politico cu a participa den eleccion incluyendo esun cu tabata den gobierno a ripara cu e reto mas grandi tabata e insiguridad den nos comunidad. Cual den e ministerio di Husticia esaki a wordo hopi neglisha e ultimo añanan aki segun minister Bikker. Fuera di e hecho cu a bin un ministerio mas pa loke ta trata integracion, cu tambe tin su retonan riba su mes. “Nos a constata tambe cu tin hopi leynan cu a wordo adopta pero cu no ta wordo aplica. Den cuadro cu esey nos a bin cu e solucion pragmatico aki di bay introduci mas agentenan extraordinario.”
Cambio den top di polis
Manera nos a yega di publica den un entrevista exclusivo cu korpschef Dolfi Richardson, pronto un otro persona lo mester tuma su luga mientras e ta cuminsa encarga su mes cu otro retonan den husticia. Pa loke ta trata e mando y kico ta bay pasa cu top di polis pa trece mas stabilidad den e Cuerpo, minister Bikker a laga sa cu esaki ta tumando un poco mas di loke el a spera pa tin claridad den dje. “Nos ta trahando riba esaki seguramente. E ta bay tuma un tiki mas, pero e hecho si ta cu nos a pone como meta cu nos ta bay tuma un decision mas pronto cu ta posibel.” E ta agrega cu mirando cu tin tanto otro tema cu ta exigi atencion di su ministerio, ainda no por bisa con lihe esaki por keda cla. Pero e mandatario ta spera cu den transcurso di e dianan nos dilanti y kisas mas tarda cu prome cu aña habri tin claridad riba esaki.
“Claro den bon combersacion cu tur e actornan envolvi.” E mandatario ta bisa cu nan ta den proceso di delibera y a haya un decision cu minister di Husticia anterior no a laga cu mucho claridad. “E no a regla e asuntonan den direccion cu tabata kier pa e korpschef akinan lo por a bay un reto nobo. Anto nos a hereda e decision akinan cual tabata practicamente un decision den conseho di minister pero no a wordo formalisa. Y awor akinan esey ta pone cu den tur e otro retonan cu nos a haya den apenas tres siman di gobernacion, cu nos mester a bay dedica atencion riba e reto akinan tambe. E ta tumando un tiki mas di loke mi a premira pero mi ta pidi pasenshi, nos ta atendiendo cu esaki diligentemente”, minister Bikker a splica.
Sr. Richardson ainda ta funcionando y no tin un vacatura ainda. E decision pues cu a wordo tuma pa dun’e un otro reto a keda na cuminsamento. Tin rumornan cu ta Trudy Hassell lo tuma e luga di sr. Richardson pero minister a desmenti esaki bisando cu ainda tur cos ta den deliberacion.
