Minister Armando Lampe a informa cu gobierno lo duna forma na e departamento di DUO pa 2021.

DUO lo ta e departamento nobo encarga di controla tur loke ta subsidio pa e directivanan di scol. Segun e mandatario pa prome biaha gobierno lo bay conoce un maneho y control financiero riba presupuesto di enseñansa. “Nos mester mira control como algo positivo,” el a bisa.

Caso SKOA

El a anuncia cu tur directiva di scol lo bay conoce un cambio riba un control mas stricto riba subsidio otorga na nan. Den e caso aki el a trece como ehempel e caso di SKOA cu -segun e mandatario- prome cu fin di aña gobierno a pone extra placa disponibel pa por paga conforme e ley e trahadonan di limpiesa.

El a haci enfasis cu e pago aki ta conforme e ley. E mandatario a trece dilanti cu tabatin sentencia di hues cu a mustra cu SKOA a actua ‘contra ley’ pa loke ta e situacion di e trahadonan di limpiesa.

E mandatario a referi encuanto e falta claridad riba e asunto aki, ya cu directora di SKOA a yega di trece dilanti cerca Bon Dia Aruba, cu ainda e situacion di pago relaciona cu e trahadonan di limpiesa ta den disputa, y ainda no a bin cu resolucion riba e problema aki.

Segun e mandatario SKOA ta papia di un bodemprocedure, mientras cu no tin un bodemprocedure. Talbes tin procedure cu eventualmente ta bay termina den corte di apelacion. Pero e ta haya cu esaki no ta e caso, ya cu loke SKOA a entabla via LAR ta un bezwaar cu por dura algun aña prome cu e ta wordo atendi. El a splica cu loke e comision aki lo bin cune ta un conseho of advies na e minister. Y no un resolucion di corte.

Mientras e mandatario ta afirma cu e resolucion di corte t’ey caba y e rapport di Centraal Accountantsdienst ta mustra claramente ‘cu prueba’ cu SKOA a actua contra ley.’

El a bisa cu no tabatin base legal pa apunta e trahadonan di limpiesa como cuerpo ambtenaar of personal di enseñansa y paga nan conforme personal di enseñansa. Tambe el a bisa cu no tabatin base legal pa triplifica e cantidad di trahadonan di limpiesa, sin niun decision den Conseho di Minister ni decreto ministerial.

Segun e mandatario SKOA tabata consciente cu nan tabata actua contra ley, ora nan a haci e cambio aki. Pasobra te 2015 nan tabata paga e trahadonan di limpiesa conforme explotatie kosten, ya cu esaki ley ta stipula, y tur directiva di scol sa kico ta cay riba e concepto aki, y un di nan ta limpiesa di scol.

E hecho aki- segun e mandatario- mester wordo coregi ya cu no tin excepcion pa SKOA, ya cu tur otro directiva di scol ta wordo trata conforme e ley aki. E unico caminda cu SKOA tin ta esun di ehecuta e resolucion di corte y cumpli cu ley, el a laga sa.

Nan lo mester paga bek of restitui loke gobierno a duna di mas, ya cu nan ta aplica esaki pa tur directiva di scol. Tur directiva di scol cu a haya subsidio di mas lo tin cu restitui e placa ey y nan lo haci’e conforme cu nan capacidad di pago pa no afecta e calidad di enseñansa, segun minister Lampe.

 

Pero DUO tambe ta bini den un aña cu pais Aruba lo wordo controla y supervisa pa Hulanda riba entre otro tereno financiero. E ta haya cu nos mester mir’e como algo positivo tambe. E ta considera cu e control aki ta e oportunidad te hasta un orguyo cu bo mester tin pa demostra cu bo ta honesto cu placa di pueblo. E control cu DUO lo bay eherce riba directovanan si scol no mester interpret’e como falta di confiansa, sino como un oportunidad pa demostra hosnestidad cu placa di pueblo.