Den despedida di gobierno anterior, cantidad di tereno den area di naturalesa a wordo otorga segun minister di Infrastructura a trece dilanti ayera. E mandatario ta bisa cu gobierno lo bay informa parlamento riba e negoshi di tereno di ‘escala hopi grandi’ cu tabata tin.
“Mi kier djis recorda cu dos documento na sr. Sevinger loke ta bin ainda pe e dianan nos dilanti”, minister encarga cu Infrastructura, Otmar Oduber (POR) a expresa ayera durante un rueda di prensa. Akinan el a reacciona na comentarionan cu parlamentario den oposicion y ex minister di Infrastructura Benny Sevinger (AVP) a dirigi na su persona durante un rueda di prensa e siman aki relaciona cu coordinadornan cu a haya carta di retiro di trabao. Ayera e mandatario a bini cu dos documento di un gran cantidad di documentonan cu ya caba ta den poder di gobierno, documentonan cu no ta registra na e organisacion Departamento di Gobierno di Informacion, ni na Bureau, tampoco na DIP. Nan ta documentonan/cartanan di gobierno cu tabata wordo traha riba USB sticks, segun minister Otmar Oduber ta bisa. E documentonan no tabata wordo laga atras den administracion y asina tin hopi mas informacion cu e ministerio actual ta colectando.
Negoshi di tereno
E mandatario a laga sa ayera cu manera tin tur informacion debidamente hinca den otro, gobierno lo ta bayendo parlamento pa informa parlamento riba loke el a expresa tabata un ‘negoshi di tereno di un escala hopi grandi’ tumando luga e ultimo temponan aki.
E mandatario a sigui splica cu den dos documentonan so cu el a atende den e siman aki, ta trata di Antidateren cu e minister anterior a haci pa por purba hustifica ainda un tiki mas cerca di su momento di despedida. Caminda dia 26 di september 2017, management team di DIP e tempo ey a manda un contract pa minister cu no tin ningun documento pe pero cu ta costa pais Aruba 4 miyon florin pa e proximo cinco aña riba un huur di un edificio, di casi 70 mil florin pa luna. minister Otmar Oduber a sigui splica cu mientras cu 26 di september 2017 e contract aki ta wordo manda por medio di management team di DIP (un solo persona a firma) anto e minister encarga cu infrastructura e tempo ey a pone riba e contract cu el a firm’e riba 22 di september. Siendo cu esaki a wordo ofreci pa firma cuater dia despues. “Pa mustra con e cosnan tabata bay den e despedida di e gobierno anterior”, e mandatario a expresa.
Mas cu 20 otro caso
E mandatario a trece dilanti un otro caso pa prensa di un caso di un proyecto relaciona cu hotelnan All Inclusive. E gobierno anterior riba 20 di october 2017 ta haya un carta for di e mesun miembro di management team aki di DIP pa un conseho, e mesun dia ey gobierno ta bay di acuerdo. Cu e conseho cu a drenta e ora ey tocante un proyecto cu tin cu bay haya 670 camber All Inclusive, mas 240 camber TimeShare. E conseho minister mester responde prome pa despues e departamento traha e contract, den e caso aki firma y fecha 1 di october 2017. “Claramente Antidateren, y claramente purbando di purba cu ta pasobra ta cerca di dia di eleccion y tabata algo cu tabata andando. E peticion ta di 2015 cu a drumi pa dos aña largo, nada a wordo ehecuta riba dje, no tin ningun conseho atrobe ni documento”, e mandatario a bisa. Citando documentonan den su man cu ta bini for di e propio clientenan segun e mandatario a declara ayera. Esaki e mandatario a haci ayera pa mustra comunidad di Aruba ‘ con a maneha cu asuntonan di tereno’ esunnan cu ta para grita awo di persecucion politico y riba corupcion. “Esaki ta djis dos di e mas di 20 cu mi ta conoci cu nan cu a tuma luga despues di eleccion cu ya caba e minister tabata na altura cu e no ta bay t’ey.”
E mandatario a haya contract di famianan cu tur dia ta keha y insulta su persona, pero e ta laga esaki pa ‘parlamento y comunidad di Aruba’ pa wak con despues di eleccion, huurmento di edificio a wordo extendi, contract di famianan cu ta hopi liga na fraccion AVP. E mandatario ta bisa cu poco poco lo sigui bin cu mas di e informacion aki unda cu aparentemente sumanan di 10 mil florin pa luna tabata wordo paga pa basta aña.
Kiosconan
Gobierno a tuma asistencia huridico pa por atende cu tur e casonan aki mescos cu por ehempel e situacion di e kiosconan dilanti Waf. E kiosconan dilanti waf tabata destina inicialmente pa por duna nan na e comerciantenan cu tin otro banda di caminda na parkeerplaat di Arubus, y cu personanan cu ta haci artesania local lo haya e resto.
Minister Otmar Oduber(POR): “Riba 7 di november 2017, contractnan a wordo duna pa hendenan cu no ta haci artesania local caminda bo ta wak claramente nomber di coordinadornan, trahadonan di minister ta esunnan cu a haya. Ki pura bo tabata tin pa duna contract na e momentonan ey cu bo no por a warda pa e gobierno nobo bin?” Cada un di e personanan aki lo haya carta tambe pa mustra riba e hecho cu tabata tin hopi otro hende prome cu nan, hopi otro cu si mester a bin na remarke pa por haya esakinan.
