Manera conoci, e ultimo fin di siman aki di dianan di fiesta a sosode un atraco na Plug & Play Electronics na Ponton. Atracadonan arma a bay cu mas o menos 4000 florin y 20 pa 30 celular nobo segun autoridadnan. Despues di un persecucion mas anochi e mesun dia polis a logra detene un sospechoso.
10or diasabra anochi Atraco Team a ripara un auto coriendo zig zag na altura di Kamay na Noord. Polis a duna chauffeur señal pa para, pero dado momento tur dos ocupante a sali na careda for di e auto. Mesora a cuminsa y atraco team a logra detene un di nan. Ta trata di un hende homber di nacionalidad Venezolano. Den e auto a haya un tas cu varios cellular y charger. E auto a keda confisca pa mas investigacion. E articulonan ta cuadra cu esunnan cu a horta diasabra na Plug & Play Electronics na Ponton.
Intensifica vigilancia y tecnologia nobo
Segun minister di Husticia Andin Bikker (POR), lo bay haci un apelacion na alto comisario pa e por intensifica e vigilancia pa extra surveillance riba banconan, joyeria, luganan di lotto y tur otro luga cu tin pertenencia valioso. Esaki mester por trece e siguransa den e dianan di fiesta pa e por bay mas trankil cu ta posibel segun e mandatario. “Manera ta conoci tin e fondo pa combati criminalidad y lo bay aloca parti di dje pa mehora e vigilancia cu tecnologia riba cierto luganan cu ta considera como vunerabel. Haciendo esaki siguramente lo por bay restaura mas tanto cu ta posibel siguridad di pais Aruba.”
E tecnologia mester bin specialmente riba luganan cu ta bende Lotto y cu camara por mehora e vigilancia di e establecimentonan aki segun e mandatario. Semper e problema tabata fondo pero awor lo bay haci uzo di esey. E caso di atraco na San Nicolas por ehempel, e victima a bisa cu e la wordo asina den chok cu e no tabata sa ki number pa yama.
Cu tecnologia esaki lo bira mucho mas facil y pone botonnan pa alarma cu directamente por comunica cu central di polis, asina e minister ta bisa.
