Pa segundo aña Cas di Cultura y Grupo di Teatro Zengenue, bou guia di teatrista y docente di drama CKV Ferdinand Franca, ta presenta Festival di Teatro Little Stars! E aña aki cu e cuenta di ada di Sneeuw Blanco (Sneeuwwitje).
Cuater scol basico, esta Mon Plaisir Basis, Dominicus Colege, Colegio Santa Anna y Pius II school a traha riba nan mesun interpretacion di Sneeuw Blanco. Tambe nan a traha riba nan propio decor y trahenan. Di e manera aki Cas di Cultura ta inculca e amor pa teatro den nos generacionnan hoben y duna nan hermentnan pa por expresa nan mes. Teatro ta bon pa autoestima, ta siña con pa siña texto for di cabes, ta haya sa con pa traha den ekipo, pues manera deporte, teatro ta siña habilidadnan cu lo sirbi un persona pa full su bida y carera profesional.
E arena teatral ta bayendo den bon direccion na Aruba. Fin di aña Cas di Cultura tambe lo presenta Grease, un musical y pelicula iconico y masha keri, cu solamente talentonan local den e rolnan principal y den e banda live. Dia 25 di mei publico por admira e 4 scolnan aki den un mini festival di teatro na Cas di Cultura unda nan tur lo presenta nan propio version di Sneeuw Blanco. E proyecto a haya apoyo di Prins Bernhard Cultuurfonds Caribisch Gebied y Familie Koeman Fonds op Naam. No perdele y yega cu e muchanan di cas.
