E carta cu a sali den prensa ayera cu gobierno ta destina e veld di Little League na Dakota pa un shelter pa 500 refugiado Venezolano maximo, a trece hopi conmocion. No obstante pasobra gobierno ta papia di un veld bandona mientrastanto ainda ta uza esaki pa train e muchanan di Litte League bibando den e bario.
E corant Solo di Pueblo a saca e noticia prome ayera mainta. Un poco despues Bon Dia Aruba tambe por a pone su man riba e carta (por haya esaki completo riba nos website Bon Dia 24). E carta ta di director Marlon Croes di DOW (fecha 13 di september) informando minister di Infrastructura Benny Sevinger riba e ultimo desaroyo pa cu e preparacion riba un fluho masal di Venezolano.
E director ta bisa cu e Oficina pa Prevencion di Desaster conhuntamente cu e otro departamentonan encarga cu e plan di calamidad, a dicidi cu lo uza Centro Deportivo Betico Croes (Sporthal) na St. Cruz como e prome shelter. Akinan e Venezolanonan lo meld oficialmente y por keda 72 ora maximo. Despues nan lo bay na e shelter cu gobierno kier traha na e veld di Dakota.
DOW ta menciona cu tin un ‘tercer’ partido ya a pidi pa haya e tereno aki pa un otro destino. Bon Dia Aruba sa cu esaki ta un peticion di Aruba Center Little League cu awor ta uzando e tereno ainda pa train e muchanan. E peticion no ta di awor pero pa hopi añanan caba. Nan a entrega plan y kier renoba e luga, manera e tribuna y edificionan. Sinembargo nan peticionnan tabata en vano.
Den e carta por mira cu DOW ta conseha e minister pa no honra e peticion di e partido aki te ora e crisis y e necesidad pa un shelter ta ‘tras di lomba’. DOW tambe ta pidi e minister pa duna permiso pa basha e edificionan abou y cuminsa prepara e tereno.
Bon Dia Aruba a papia cu un habitante tambe y e ta bisa cu e no sa nada di un shelter. E coach Cai Cai Williams di e Little League ta reacciona desapunta. Den e siguiente edicion lo sali e entrevista completo.
Plan bunita, pero no tin placa
Un otro punto interesante ta cu e plan pa e ‘migracion masal’ di Venezolano, ta algo mas tanto cu ta mustra bon riba papel. For persona envolvi di departamentonan envolvi Bon Dia Aruba ta tende cu te awor no tin placa pa por ehempel cumpra cot y otro necesidad. Tampoco tin un bon comunicacion ainda ken mester haci kico ainda. Locual Bon Dia Aruba ya a trece un par di luna pasa unda nos ya a mencion cu gobierno di Aruba a destina tin dos shelter pa refugiadonan Venezolano.
E problema ta cu gobierno ta considera e plan un secreto y no kier informa ni pueblo riba e detayenan. Sinembargo nos a tende di diferente fuente envolvi cu e informacion for di e team cu ta traha riba e plan, nan no ta comparti debidamente cu trahadonan di e departamentonan manera polis y Asunto Social. Tampoco tin claridad si tin suficiente hende cu por traha 24/7 pa yuda e refugiadonan. Awor e trahadonan publico mester haci esaki banda di nan trabou normal.
E veld na Dakota ta banda di e oficina di Cruz Cora. No ta mucho cla kico e rol di e organisacion aki ta den e plan di gobierno. Un punto cu Bon Dia Aruba ya a trece dilanti ta cu pa hopi tempo ta riba agenda pa gobierno y Cruz Cora cera un acuerdo pa e organisacion cu ta draai riba boluntario y donacion, yuda den casonan di calamidad ( no solamente den e caso di Venezolano, pero tambe cu horcan etc.). Sinembargo ainda esaki no ta realisa.
