Vocero di Cuerpo Policial Aruba, Lito Lacle a duna di conoce cu e problema di mas grandi cu Departamento di Trafico tin, durante ultimo añanan, ta accidente di auto.
E vocero a splica cu tin hopi hende envolvi den dalmento y ta bandona e sitio, sin cu documentonan wordo controla pa Polis di trafico of pa un persona asigna pa Minister di Husticia.
Di mesun manera, el a remarca cu esaki ta un acto castigabel pa ley, exactamente den articulo 4 lid 2, Landsverordening Wegverkeer.
Ademas, Lacle a informa cu conforme cu articulo 40 lid 4, esaki tin un castigo di maximo 1 aña di prizon y un boet di maximo 25 mil florin, pa ta envolvi den un accidente y bandona e sitio.
Asina mes, Lacle a declara cu te cu dia 30 di juni di aña aki, mas di 310 persona ta envolvi den accidentenan aki y e cifranan di dalmento ta mas cu 4.000, “Personanan envolvi den un dalmento y core bay tin un castigo di prizon”,el a sigura.
