E ta considera e dama di casamento. Un ‘wedding planner’ extraordinario. Lissy Lampe ta un number super popular den turismo di Aruba, pero particularmente den e mercado di casamento. Un dama alegre, semper cu un sonrisa, pero trahado duro y disciplina. Un hende social for di tempo cu e tabata bay Colegio Arubano y a sigui cu e mesun actitud despues.

Lissy a bay studia na Webber College, awor aki Webber International University na Babson Park Florida, un area cerca di Orlando y despues di 2 aña el a bay Florida International University, FIU for di cual el a gradua na 1985 den Hospitality & Tourism management.

Despues di su estudio, Lissy a keda Mercaunda el a traha tres aña ta maneha un agencia di biahe den Coral Gables, y despues cu ALM na Miami. “Mi no a kere cu mi lo bin biba Aruba bek pero circunstancia di bida a pone cu mi a bolbe na fin di aña 94. Bek na Aruba, mi a sigui traha cu ALM y despues a bira Air ALM. Despues di 9/11 mi a tuma un pakete, na December di 2001, y a sali for di e aerolinea.

Lissy tabatin e pensamento pa tuma un ‘break,’ tuma un pausa den su carera laboral. “E idea tabata di “no traha” eventjes pero un amiga a yamami mi fin di December y bisami cu e tin un trabou pami. Mi a bay papia cune na Januari di 2002 y a ‘fall in love cu e trabou. Mi a tuma un curso, e tempo ey Beverly Clark, y mi a studia riba mi mes, plus cu mi estudio y experience/back ground e tabata facil pa tur cos a cay na su luga. Danki Dios cu te ainda mi ta echt gusta loque mi ta haci.

Pa hopi tempo ehecutivonan den turismo tabata urgi Gobierno pa cambia ley pa asina permiti stranheronan casa na Aruba. Pa hopi aña e no tabata posibel, y parehanan unicamente por a haya un bendicion cu no tabata nada oficial. Esnan den turismo a reconoce e balor di e ‘niche marke’ di casamento. Y Lissy tambe. “Mi a cuminsa traha net ora cu Sra. Perez y Sra. Osbourne a haci nan presentation na Gobierno di Aruba y a convence nan pa cambia e leynan cu a permiti cu non-residents por casa legal na Aruba,” Lampe a bisa Bon Dia Aruba.

Y Lissy Lampe tabata cla pa organisa e casamentonan aki. Un actividad cu ta rekeri hopi planificacion y pasenshi. “Mi prome ‘wedding’, pa bisabo berdad, mi no ta corda. Pero mi sa cu tur ta super nice.

Pero semper tin un cu ta keda graba. Y esey tabata un di eventonan cu hasta a haya atencion den media internacional. “Esun mas grandi y cu mas impacto no ta un wedding per se pero e ‘Largest Renewal of Vowsin the Caribbean’ cu a start na 2017 y cu nos a ripiti na 2018 y 2019. Si no tabata pa COVID-19, lo e la sigui como un evento annual. Esaki ta unda algun cien pareha ta renoba nan promesanan simultaneamente riba Eagle Beach. What an experience,’” Lissy a bisa.

Locual ta trata e casamento individual mes, e tabatin varios grandi, particularmente na Tierra del Sol cu a impacta. “Pero cada uno ta special,” Lampe a bisa Bon Dia Aruba.

Retonan

E mester ta cla pa tur hende cu organisa un casamento na Aruba ta inclui maneha e burocracia y tambe e celebracion. E no ta un trabou facil. “Retonan ta basta. Tin dos extremo. Tin e caso di e no-residente cu ta bin Aruba hopi y ta kere cu nan conoce tur caminda y sa tur nos leynan cu mester haya splicacion cu no ta mane nan ta kere, y e otro extremo, cu ta esun cu ta bin Aruba sin conoce e lugar y no por imagina su mes cu un isla den Caribe por tin tanto cos pa ofrece.” Lissy a bisa cu e lo por conta 1001 storia di tur locual el a experiencia cu tur ‘su casamentonan.’

“Mi ta den contacto cu hopi di mi clientenan. Algun a bira mas cu amigo .Gewoon famia cu ta message sigur tur siman. Nan ta keda asina gradecido cu e ta increibel.”.

Na December pasa, un pareha cu Lissy a organisa nan bruid na 2008, a trece nan yiunan di 8 y 10 pa prome biaha cu nan. “Nan si tabata bin tur aña y nan a insisti cu mi mester bin desayuna cu nan pa conoce ‘the products of my labor’ mane nan mes ta bisa. Nos a click asina bon cu mi a baby sit e muchanan pa nan por tin ‘date night’ y despues nan a bin come serca nos riba Noche Buena. Pa nan, e dos dianan ey tabata e ‘highlight di nan trip,’ den nan propio palabra.”

Tin otronan cu ta bin Aruba cada 6 luna y “cada biaha nos ta hasi algo leuk hunto por lo menos un biaha durante nan estadia. ‘They will not take no for an answer.’”

Lissy no ta sconde su angustia ora tin tempo di awacero. Logico, pasobra e bruidnan ta pafo y awa ta trece reto adicional. Pero ta crea un toke special tambe. “Mi tabatin tres reto specifico cu awa cero den e 20 aña di ta organisa bruid 3. Un pareha a casa pa civil y a laga e bendicion na beach un banda pa motibo di yobida y tur hende a bay directo pa e fiesta. Nos a hiba e fiesta paden. E otro dosnan nos mester a move e evento paden caminda e ceremonia y receptie tabata na e mesun luga. Tabatin un di cuater caso cu a pidi nos pa warda pa e awa pasa y despues nos a seca e stoelnan y a haci e ceremonia casi casi den scur,” Lissy ta conta na harimento.

COVID-19 y lockdown

Ora nos a bay den lockdown, ki tristesa. Mi ta kere 60% di nos bruidnan a pospone. Ainda nos ta trahando riba algun cu kier a casa na 2020 y e resto a cancela. Ki pa haci?

Mi ta kere e efecto tabata temporal paso mane cu Aruba a habri nos a start back ‘as if nothing happened,’ claro teniendo cuenta cu e reglanan.”

E experiencia cu e pandemia y tur e reglanan pa evita transmision a trece un presion adicional pa tur ‘event planner.’ Y pa Lissy e no ta diferente. “Locual mi a siña ta cu sin importa con hopi y con bon bo plan algo bo mester por ‘adjust y adapt.’ Maske, esaki ta algo cu ami semper a tene cuenta cu n’e. Pero depende e situacion, mester hiba bolcientenan den e direccion cu bo kier pa nan tambe compronde e realidad y asina nan tambe ahusta y adapta.

 

Y Lissy ta logra. Pasobra despues di asina hopi aña ta organisa casamento pa turista, no residente, e ta keda hopi druk. Tin mas ‘wedding planners’ pero e no a afecta su mesun negoshi. “Ami lo bisa cu mester bin un regulacion si, pasobra e ta un actividad di un dia y esun cu ta kere cu e ta facil ta fout bezig. Organisa un evento, un casamento no ta facil ora bo tin e responsabilidad di un dia hopi special. No tin un ripiticion si algo bay robes, pa un pareha cu a soña cu esaki pa añanan y abo tin’eden bo man. Si un cos bay y fout bo a daña pa nan, pa bo mes, pa bo compania y mas duro ainda pa Aruba. Corda semper cu un foutje ta worde ‘propaganda’ por lo menos 10 biaha.”

Y apesar di tur e retonan, Lissy lo no kier haci algo diferente. “Lo mi scohe pa e trabou aki atrobe, sin duda.”