Lisette Gomes: “Nos ta para mesun caminda cu 6 aña pasa”

Hopi mas caso di abuso sexual ta tuma luga, cu tin registra. Esaki ta un motibo cu ta importante y te hasta necesario pa Aruba tin un team separa pa atende cu e casonan aki. Lisette Gomes di Fundashon Lisette Gomes a bisa Bon Dia Aruba cu nada a cambia desde cu el a institui e fundacion na 2010 cu meta pa conscientisa y hisa castigo di personanan cu comete abuso sexual.

“E situacion ta practicamente mesun cos. E unico cos cu a cambia, pa mi ta sincero ta e hecho cu Jeugd en Zeden Politie tin ekiponan di studio verhoor. Pues esaki por wordo haci cu nan mesun ekiponan pasobra den pasando nan tabata fia for di St. Maarten (si mi no ta fout). Pues no ta tur ora e tabata disponibel. Pero esey ta algo cu ta asina for di 2010. P’esey mi ta bisa nos ta para na mesun caminda, pa mi no bisa pio.”

Sra. Gomes a splica cu Poli no ta atende cu mucha cu wordo sexualmente abusa, nan ta dirigi nan na un pediatra, cual ta un tin na Aruba pues si e no ta disponibel mester warda. Sra. Gomes a splica cu e sa di caso unda cu hendenan mester a warda 1 siman, otro 2 siman of tambe 1 luna pa haya cita. E dokter aki tin e experiencia pa wak e muchanan aki, y tur cos ta bay basa riba su rapport. Pero si bo tin un mucha cu a wordo abusa awe, tur DNA ta wordo perdi den algun dia, segun cu e mucha baña, y e ora no ta haya nada mas, Sra. Gomes a splica. El a pone enfasis cu esaki ta un problema hopi grandi.

“E ta desapuntante pasobra e ta obvio cu mester placa pa e departamento di JZP por funciona bon. JZP ta keda bisa cu nan no tin suficiente personal, cosnan cu ta conoci for di hopi tempo caba. Pues awo cu e tema ta cayente atrobe, ta ora pa haci pregunta atrobe tocante kico ta wordo haci.” Sra. Gomes a bisa cu ideal lo ta pa set up un team special pa atende cu casonan di abuso sexual di mucha pasobra tin hopi caso tumando luga. E cifranan na Bureau Sostenemi no ta cifranan corecto y ta mustra cu e ta abou, sinembargo no ta tur caso ta bay Bureau Sostenemi. “Tin di nan ta bin cerca mi, y nan no ta bay cerca Bureau Sostenemi y vise versa. Pues e ta dificil pa mira cifra real. Kisas JZP lo tin un miho bista di cifra, pasobra nan ta mira e keho. Pero tambe mester tene cuenta cu no ta tur mucha cu wordo controla pa e dokter ta yega JZP como keho, pasobra e momento ey e dokter tambe ta tuma declaracion di e mucha y ta pone den su rapport. Por sosode cu esun cu hiba e mucha e momento ey ta haya sa ken a comete e acto y por dicidi di keda keto tambe pa e no bira un problema”.

Sra. Gomes a termina bisando cu esaki ta algun di e retonan cu tin na comienso caba di e proceso largo pa busca castigo pa e persona culpabel di a comete acto di abuso sexual contra di un mucha. Dialuna lo tin un conferencia di un tata cu kier a trece su caso den medio di comunicacion mirando cu e kier preveni un abuso sexual. Y ta cuestionando tarea di Voogdijraad den e caso aki cu ta cerca nan pa algun aña caba. Ultimo tempo ta hopi caso ta lantando cu ta cuestiona e tarea di Voogdijraad.