Den cuadro cu e manifestacion cu ta bay tuma luga dia 27 di april na Juliana School cuminsando for di 2or di atardi, Lisette Gomes, presidente di fundacion ”Lisette Gomes: Stop Abuso Sexual Di Mucha” ta haci un invitacion nacional na pueblo di Aruba pa bin apoya e causa y kier recorda tur hende cu esaki ta bay ta un manifestacion pasivo.
”Nos no ta kere den violencia pa yega na un solucion, nos ta papia cu otro manera debe ser pa asina yega na un solucion mas pronto cu ta posibel”, Sra. Gomes ta bisa Dialuna atardi den un rueda di prensa na unda e ta pidi pueblo di Aruba pa bin apoya pa sali masalmente pa manifesta contra abuso sexual di mucha na Aruba. E prome 100 persona cu yega lo ricibi un T-shirt cu ta bisa ‘Stop Abuso Sexual Di Mucha’ y ta pidi henter e comunidad pa bini na preto bisti. ”Aruba ta na luto pasobra abuso sexual di mucha ta haciendo un efecto enorme riba nos muchanan y nan inocencia ta wordo perdi”. Segun Sra. Gomes, a haci un invitacion na presidente di parlamento 1 siman y mey pasa, minister di husticia, minister di salubridad y minister di asuntonan social.”Atrobe mi kier haci un yamado na nan aunke mi sa cu e ta un dia liber, por fabor bin tuma e manifiesto pasobra e casonan a cuminsa bira serio na Aruba y nos kier mira un solucion mas pronto cu ta posibel pasobra e cos aki a bira di mas” sra. Gomes ta bisa.
”Den e manifiesto nos ta menciona cu nos kier un respuesta dentro di 30 dia den escrito di gobierno como tambe parlamento”, Sra. Gomes ta agrega. Sra. Gomes ta bisa locual ta hopi importante ta cu e la ripara cu tin hopi sosten di e comunidad, tin un grupo di mayornan cu a bini hunto pa apoya cual tambe ta preocupa di e situacion y tur hunto a uni forsa pa e manifestacion aki.
